Հակառակորդը խաղաղության թեզի ներքո փորձում է խաբկանքի մեջ գցել ՀՀ-ին և Արցախին. Սեյրան Օհանյան

Խոսել լիակատար անկախության մասին այսօր դժվար է, որովհետև ինքնիշխանությունն արտահայտվում է առաջին հերթին նրանով, որ դու ունես տարածք, տնտեսություն և  տարածքային ամբողջականության և սահմանների անձեռնմխելիության տերն ես։ Այս մասին լրագրողների հետ զրույցում ասաց «Հայաստան» խմբակցության ղեկավար, ՊՆ նախկին նախարար Սեյրան Օհանյանը՝ հույս հայտնելով, որ կգանք այնպիսի մի իրավիճակի, որ միասնական ջանքերով դուրս կգանք այս իրավիճակից։

«Այսօր, երբ ադրբեջանցիները գտնվում են մեր սահմաններում, շատ տեղերում սադրանքներ են կազմակերպում, լկտի են պահում իրենց, մեր տարածքից դուրս չեն գալիս, խոսել լիակատար ինքնիշխանության մասին դժվար է, բայց պետք է հասկանանք, թե ե՞րբ է եղել հայ ազգի համար, որ դյուրին իրավիճակում ապրենք։ Միշտ էլ պայքարի մեջ ենք եղել, միշտ էլ դժվարություններ են եղել և կարծում եմ, որ ցանկացած այդպիսի հարված պետք է փորձենք օգտագործել գոտեպնդվելու և այս իրավիճակից դուրս գալու համար»,- նշեց Օհանյանը։

Օհանյանի խոսքով՝ պատերազմում կրած պարտությունից հետո մեր հակառակորդը, որը խաղաղության թեզի ներքո փորձում է խաբկանքի մեջ գցել ՀՀ-ին և Արցախին, օրըստօրե մխրճվում էր մեր սահմանները, սադրանքներ է կազմակերպում։

«Սյունիքում կազմակերպված սադրանքները խոսում են այն մասին, որ այս իշխանություններն ադեկվատ որոշում չեն կարողանում ընդունել»,- նշեց Օհանյանը։

Աղբյուր` Փաստինֆո