Մենք կտոնենք անկախությունը երբ անկախ կլինենք. Հայտարարություն

Սեպտեմբերի 21-ը Հայաստանի Հանրապետության Անկախության օրն է: 

-----

30 տարի առաջ այդ օրը հայ ժողովուրդը որոշեց, որ Հայաստանը պետք է անկախ ինքնիշխան պետություն լինի: Հայ ժողովուրդը վերահաստատեց իր որոշումը (Արցախյան պատերազմի) ընթացքում՝ ազատագրելով Արցախը և թույլ չտալով թշնամուն ներխուժել Հայաստանի Հանրապետություն: 

Այսօր, երբ դաժան և անարդար պատերազմի արդյունքում թշնամին զավթել է Արցախի մեծ մասը և կանգնած է Հայաստանի Հանրապետության տարածքում, ավելի քան ակնհայտ է, որ հենց Արցախն է եղել Հայաստանի Հանրապետության սահմանների անձեռնմխելիության երաշխիքը:

30-ամյա մեր անկախությամբ մենք պետք է երախտապարտ լինենք նահատակված ու կենդանի մեր հերոսներին, որոնց սխրանքների և կյանքի գնով Հայաստանի Հանրապետությունն այսօր գոյություն ունի:

Սեպտեմբերի 21-ը տոն է, բայց մենք այդ օրն ուրախանալու առիթ չունենք: Մենք պարտք ենք մեր հերոսներին, նրանց զավակներին, ծնողներին, քույր և եղբայրներին:

Մենք պարտավոր ենք մեր հերոսների կիսատ թողած գործն ավարտին հասցնելու, Հայաստանը հզորացնելու և ազգային արժանապատվությունն ու հպարտությունը հայերին վերադարձնելու:

Մենք խիստ դատապարտում ենք թշնամու հետ՝ Հայաստանի Հանրապետության ազգային պետական շահերը նսեմացնող համագործակցության գնացող իշխանության կողմից կազմակերպվող տոնակատարության անցկացումը:

Սեպտեմբերի 21-ին մենք գնալու ենք Եռաբլուր: Գնալու ենք ոչ թե սգալու, այլ մեր հերոսներին հարգանքի տուրք մատուցելու, նրանց անավարտ գործն ավարտին հասցնելու խոստում տալու:

Մենք անպայման կկերտենք Հայաստանի Հանրապետության Անկախության օրը: Կտոնենք Անկախության 31 ամյակը թե 40՝ էական չէ: Կտոնենք անկախությունն այն ժամանակ, երբ թշնամին այլևս հայկական հողից մարդ չի առևանգի, երբ Հայաստանի Հանրապետության տարածքով տեղաշարժվելիս թշնամին չի անհարգի մեր անկախության սիմվոլները:

Մենք կտոնենք Անկախությունը, երբ հայրենի ուժային կառույցները թշնամու հանցագործությունների մեղքը չեն բարդի մեր համաքաղաքացիների վրա:

Սեպտեմբերի 21-ին մենք նախաձեռնում ենք «Շարժում 21»-ի մեկնարկը, որի նպատակն է հակազդել թշնամու հետ բացահայտ համագործակցության գնացող իշխանությունների հակապետական գործողություններին, պաշտպանել Հայաստանի Հանրապետության ազգային պետական շահերը, նպաստել բարեկեցիկ և հզոր, ժողովրդավարական պետականության կայացմանը:

Մենք հանձն ենք առնում պատասխանատվություն՝ գործելու բացառապես ՀՀ Սահմանադրության և օրենքների շրջանակներում բայց և պարտավորվում ենք պայքարել անկոտրուն և լինել անողոք՝ ազգային ու պետական շահը՝ հայի ազգային արժանապատվությունը վեր դասելով քաղաքական այլևայլ նպատակներից, տարատեսակ խմբերի ու խմբավորումների շահերից:

«Շարժում 21»-ը բաց է մեր տեսակետները կիսող բոլոր ուժերի և անհատների հետ համագործակցության համար:

Միաժամանակ մենք համագործակցության եզրեր չենք տեսնում թշնամուց հանդիպում աղերսող, նրանց ապօրինությունները արդարացնող, պետական շահերի հաշվին թշնամու հետ համագործակցող կոլաբորացիոնիստ իշխանության հետ:

Եվ այսպես, հանդիպում ենք սեպտեմբերի 21-ին, ժամը` 19:00,

Եռաբլուր պանթեոնի մուտքի մոտ!

ՀՈՒՐԱՐՏԱ ՀԿ