Արցախ բառի ավելացումն ի՞նչ է մեզ տալու. ՔՊ պատգամավոր Վիգեն Խաչատրյանը՝ Աղվան Վարդանյանի. Տեսանյութ

ԱԺ Պետաիրավական հարցերի մշտական հանձնաժողովի արտահերթ նիստում քննարկվում է «Հայաստան» խմբակցության ներկայացրած «Հայաստանի Հանրապետության ութերորդ գումարման Ազգային ժողովի մշտական հանձնաժողովներ ստեղծելու մասին» Ազգային ժողովի որոշման մեջ փոփոխություն կատարելու մասին հարցը։

ԱԺ «Քաղաքացիական պայմանագիր» խմբակցության պատգամավոր Վիգեն Խաչատրյանն ասաց, որ երբ քննարկվում էր մշտական հանձնաժողով ստեղծելու հարցը, բավականին մանրամասն խոսվել է, որ պետք է ձևավորվի միջխորհրդարանական հանձնաժողով, և դրա միջոցով համակարգվի ամբողջ աշխատանքը, այդ թվում՝ 12 մշտական հանձնաժողովների։

Այնուհետև դիմելով Աղվան Վարդանյանին՝ հարցրեց. «Սա Ձեզ չի բավարարում, այսինքն՝ ինչ նոր բան ենք մենք այստեղ ավելացնում, եթե գործում է միջխորհրդարանական հանձնաժողով Հայաստանի և Արցախի խորհրդարանների միջև, որն ըստ էության համակարգում է բոլոր 12 հանձնաժողովների աշխատանքը։ Եթե մենք այդ հանձնաժողովն ունենք, այդ անվան մեջ Արցախ բառի ավելացումը ի՞նչ նոր որակ է տալիս»։

Պատասխանելով իշխանական պատգամավորին, «Հայաստան» խմբակցության պատգամավոր Աղվան Վարդանյանը նկատեց՝ միայն հանձնաժողովի անվան մեջ Արցախի Հանրապետություն բառի անվանումը չէ։

«Հանձնաժողովի գործառույթների մեջ թվարկվում են այն հարցերը, որոնք պետք է լինեն հանձնաժողովի քննարկման առարկա։ Ինչ վերաբերում է միջխորհրդարանական հանձնաժողովին, ապա գիտեք՝ նման հանձնաժողովներ ունենք, ասենք, Բելառուսի Հանրապետության հետ, Տաջիկստանի հետ, Կիպրոսի հետ։ Եթե մեզ համար Հայաստան-Կիրգիզիա հարաբերությունները նույն մակարդակի վրա են, ինչ որ Արցախի հետ հարաբերությունները, թերևս ճիշտ եք։ Բայց մենք խոսում ենք այսօր, այս իրողությունների պայմաններում Արցախի խնդրի գերկարևորությունը խորհրդարանական երկրի խորհրդարանի համար, կարծում եմ՝ մենք սա պետք է հաշվի առնենք»,- շեշտեց Աղվան Վարդանյանը։

Շարունակելով՝ Աղվան Վարդանյանն ընդգծեց, որ պետք է հաշվի առնել այն հռետորաբանությունը, ագրեսիվ հայտարարությունները, որն կատարում են հարևան երկրները, ուղղակի Հայաստանին պարտադրում են պահել՝ որպես ինքնիշխան պետություն։

«Կարծում եմ՝ այս աշխատանքը, այս ազդակը փոխանցելն ամենևին երկրորդական չէ, ցույց տալու, որ մենք երկիր ենք»,- եզրափակեց Աղվան Վարդանյանը։

Մանրամասները՝ 168.am-ի տեսանյութում