Ադրբեջանցիները սահմանի երկայնքով հրդեհ են առաջացնում. եթե դեմը չառնեն, հնարավոր է՝ հասնի տներին. Համայնքի ղեկավար

Արդեն երեք օր է, հրդեհները շարունակվում են Գեղարքունիքի մարզի Կութ եւ Սոթք համայնքների տարածքներում: Այս մասին NEWS.am-ի հտե զրույցում նշեց Գեղամասար խոշորացված համայնքի ղեկավար Հակոբ Ավետյանը:

Նրա խոսքով, եթե մի տեղ կրակը հանգցնում են, մի ուրիշ տեղ է սկսվում հրդեհը. «Ադրբեջանցիները կրակելու միջոցով հրդեհներ են առաջացնում: Իրենք սահմանի երկայնքով մասշտաբային դա անում են: Այս պահի դրությամբ հրդեհներ են Կութ եւ Սոթք համայնքների ուղղությամբ, որի դեմ պայքարում են թե ԱԻՆ-ը, թե բնակիչները, բայց մինչեւ մեկը հանգցնում են, մեկ ուրիշ տեղում են հրդեհ առաջացնում: Սոթքում էլ, Կութում էլ մարդկանց խոտհարքներն անցել է հրդեհի տակ: Քաղած խոտը հրդեհվել է: Հրդեհն արագ տարածվում է: Եթե հիմա ասեմ 20 հա է այրվում, կարող է 20 րոպե հետո դառնա 30 հա: Շատ դժվար է հրդեհի մարումը: Բարձր տեղերն անհանսանելի են տեխնիկայի համար: Բացի դրանից, մեզ մոտ քամիներն է ուժեղ, ինչը արագ բռնկումը տարածում է»,-ասաց Ավետյանը:

Նա ընդգծեց, որ հրդեհ առաջացնելու համար ավտոմատով չեն կրակում. «Ես չգիտեմ՝ ինչ միջոց են օգտագործում: Օրինակ, նախորդ օրը տեսել են սալյուտի պես մի բան եկել, ընկել է գյուղին շատ մոտ հատվածում: Նշանակում է՝ ինչ-որ վառվող բան կարողանում են հասցնել մեր դաշտերին: Բացի այն, որ արոտավայրերն անցան իրենց վերահսկողության տակ, մնացածն էլ հրդեհի միջոցով են ուզում վնասել: Երբ որ կարողանանք հրդեհի օջախները մարել, դրանից հետո կկարողանանք հստակ ասել, թե քանի հեկտար է այրվել»:

Համայնքի ղեկավարը չբացառեց, որ կրակը կարող է հասնել մարդկանց տներին. «Շատ հնարավոր է, եթե դեմը չառնեն: Բայց գյուղին մոտենալու դեպքում ավելի հեշտ կլինի մարելը, որովհետեւ հարթ տարածություններ են, տեխնիկան կարող է ավելի լավ աշխատել»: