Քաբուլում ԱՄՆ-ի՝ բնակելի շենքի վրա հարվածի հետևանքով զոհվել է 9 հոգանոց ընտանիք

Քաբուլում «Իսլամական պետություն» ահաբեկչական խմբավորման աֆղանական ստորաբաժանման հետ կապված թիրախների վրա ամերիկյան անօդաչու թռչող սարքի հարվածի արդյունքում զոհվել է ընտանիքի 9 անդամ։ Այս մասին հայտնում է CNN-ը՝ վկայակոչելով զոհերից մեկի հարազատին: Գործակալության զրուցակցի խոսքով՝ մահացածների թվում կա 6 երեխա: Ամենափոքր երեխաները երկու տարեկան էին։ 

Կիրակի օրը Քաբուլում ուժգին պայթյուն է որոտացել: Ականատեսները պատմել են, որ հրթիռն ընկել է օդանավակայանի մոտ գտնվող բնակելի շենքի վրա:

Ավելի ուշ Պենտագոնը հաստատեց, որ ամերիկացի զինվորականները անօդաչու թռչող սարքի հարված են հասցրել Քաբուլի օդանավակայանի մոտ այն թիրախին, որը «անմիջական սպառնալիք է»: Իսկ «Թալիբանի» ներկայացուցիչը հայտարարել է, որ հարձակումը ուղղված էր մահապարտ ահաբեկչի դեմ, որը մտադրվել էր հարձակվել Քաբուլի օդանավակայանի վրա:

Քաբուլի օդանավակայանի մոտ տեղի ունեցած ահաբեկչությունից հետո, որին զոհ գնաց մոտ 200 մարդ, այդ թվում՝ 13 ամերիկացի զինվոր, ԱՄՆ նախագահ Ջո Բայդենը խոստացավ հարվածներ հասցնել աֆղանական ԴԱԻՇ-ի ստորաբաժանման ահաբեկիչներին, որոնք ստանձնել էին հարձակման պատասխանատվությունը:

Zham.am