Գորիսի համայնքապետարանի աշխատակից Սուսաննա Մկրտչյանը չի կալանավորվի

Գորիսի համայնքապետարանի 66-ամյա ձերբակալված աշխատակցուհին՝ Սուսաննա Մկրտչյանը, չի կալանավորվի։ Երևանի ընդհանուր իրավասության դատարանը՝ դատավոր Մեսրոպ Մակյանի նախագահությամբ, քիչ առաջ մերժեց Սուսաննա Մկրտչյանի նկատմամբ կալանավորումը որպես խափանման միջոց ընտրելու մասին ՔԿ քննիչի միջնորդությունը։ Տեղեկությունը «Փաստինֆո»-ի հետ զրույցում հաստատեց փաստաբան Էդգար Արամյանը։

Հիշեցնենք, որ  օգոստոսի 16-ին ՀՀ ՔԿ-ն որոշումներ է կայացրել Գորիս համայնքի ղեկավարի պաշտոնակատար Իրինա Յոլյանին, համայնքապետարանի երկու աշխատակիցներին ՀՀ քրեական օրենսգրքի 179-րդ հոդվածի 3-րդ մասի 1-ին կետով, իսկ համայնքի ղեկավարի տեղակալ Մենուա Հովսեփյանին՝ ՀՀ քրեական օրենսգրքի 149.1-րդ հոդվածի 2-րդ մասի 1-ին և 2-րդ կետերով, 179-րդ հոդվածի 3-րդ մասի 1-ին և 179-րդ հոդվածի 2-րդ մասի 1-ին կետերով նախատեսված հանցավոր արարքներ կատարելու համար որպես մեղադրյալներ ներգրավելու մասին: Նրանք ձերբակալվել են երեկ՝ նրանց նկատմամբ որպես խափանման միջոց կալանավորումն ընտրելու միջնորդության քննության նպատակով դատարան ներկայացվելու համար։

Լուսանկարում՝ դատավոր Մեսրոպ Մակյանը։