Ու՞մ և ինչ են վերահսկելու

«Ժողովուրդը» գրում է. «ՀՀ արդարադատության նորանշանակ նախարար Դավիթ Հարությունյանը կառավարության երեկվա նիստում անդրադարձել է պետական դրամաշնորհների թեմային՝ հայտարարելով, որ պետք է ուժեղացնել դրանց ծախսման վերահսկողությունը: Հարությունյանի խոսքերով՝ այսուհետ դրամաշնորհներ ստացողները ստիպված կլինեն ոչ միայն հրապարակել իրենց կազմակերպությունների անունները, այլեւ ծրագիրը, որի համար դրամաշնորհ են ստացել, իսկ ծրագրի ավարտից հետո՝ արված աշխատանքի հաշվետվությունը:
Վերջապես սայլը տեղից շարժվեց. Հայաստանի իշխանություններն արդեն խոսում են այս ոլորտում վերահսկողության կոնկրետ մեխանիզմների ներդրման մասին, մի երեւույթ, որը նախկինում չի եղել: Դեռ ավելին՝ օտարերկրյա դրամաշնորհների վրայից գումար «թռցնելը» նույնիսկ յուրօրինակ պարտականություն է եղել` խելքի, հնարամտության եւ ճարպկության վկայություն:
Միայն թե, ակնհայտ է, որ վերահսկողական մեխանիզմների ներդրմանն իշխանություններն ինքնակամ չեն գնացել, այլ ԵՄ-ի պարտադրանքով, այն բանից հետո, երբ բացահայտվեց դրամաշնորհների յուրացման հայտնի սկանդալը:

Հիշեցնենք` փետրվարին պաշտոնական հաղորդագրություն եղավ ԵՄ հատկացված դրամաշնորհի գումարներից խարդախությամբ առանձնապես խոշոր չափերով հափշտակություն կատարելու առթիվ քրեական գործ հարուցելու մասին: ԵՄ հատկացրած դրամաշնորհներից գումարներ յուրացնելու եւս մեկ քրեական գործ էլ հարուցվեց աշնանը, եւ խոսքը մի քանի հարյուր հազար դոլարի յուրացման մասին է»:

Մանրամասները՝ թերթի այսօրվա համարում: