Բողոքի ակցիա Քաջարանում. պահանջում են ազատ արձակել Մանվել Փարամազյանին (տեսանյութ)

Սյունիքի Քաջարան համայնքում բողոքի ակցիա է ընթանում, որտեղ մասնակիցները պահանջում են ազատ արձակել իրենց համաայնքապետ Մանվել Փարամազյանին: Նրանք պարզել են պաստառներ, որի վրա գրված է. «Մանվել Փարամազյանն ազատաՄԱՐՏԻԿ է, Մանվել Փարամազյանն ազատաԶՐԿՎԱԾ է», « Պատերազմող երկրում ազատամարտիկը բանտարկվում է միայն հոգուտ թշնամու»: Ակցիայի մասնակիցներից մեկն ասաց.

«Մեր երկիրը պատերազմի մեջ է, Սյունիքի համայնքապետերը իրենց ազատամարտիկի ոգով կամավոր մեկնել են առաջնագիծ: Պատերազմող երկրում պահանջվում է առաջին հերթին միասնություն, բայց ի՞նչ ենք տեսնում: Փոխանակ այստեղ միասնություն տիրի, տեղի են ունենում նորից պառակտում, նորից քաղաքական հետապնդումներ: Պատերազմող երկրում ազատամարտիկը բանտարկվում է միայն հոգուտ թշնամու:

Ձերբակալելով Սյունիքի համայնքապետերին, նրանք առաջինը կպնում են ժողովրդի անվտանգությանը»: Մեկ ուրիշ մասնակից էլ նշեց, որ այս պայմաններում ճիշտ չէ ազատազրկել մի մարդու, ով իսկական սյունեցի է: «Մեր քաղաքը տխուր է առանց Մանվել Փարամազյանի, մենք սպասում ենք նրա ազատությանը: Մանվել Փարամազյան, մենք քո կողքին ենք»:

Ելույթներից հետո ակցիայի մասնակիցները երթ իրականացրեցին Քաջարանի փողոցներում: Նշենք, որ արդեն մի քանի օր է՝ Քաջարանում Մանվել Փարամազյանի ազատության պահանջով ստորագրահավաք է ընթանում: Հիշեցնենք, որ հուլիսի 9-ին Մանվել Փարամազյանին մեղադրանք է առաջադրվել ՀՀ քրեական օրենսգրքի 38-178-րդ հոդվածի 3-րդ մասով, 311-րդ հոդվածի 4-րդ մասով և 154.2-րդ հոդվածի 2-րդ մասով:

Առաջադրված մեղադրանքները Մանվել Փարամազյանը չի ընդունում, գտնում է, որ այս ամենը իր նկատմամբ սանձազերծված քաղաքական հետապնդման շղթայի մի մասն է:

Աղբյուրը՝ news.am