Ալիև. Ադրբեջանի ժողովուրդը «կվերադառնա» Սյունիք, Սևան և Երևան իսկ Երևանը պետք է լավ մտածի խաղաղ պայմանագրի շուրջ, այլապես հետո ուշ կլինի

Ադրբեջանի նախագահ Իլհամ Ալիևը հայտարարել է, որ Ադրբեջանի ժողովուրդը «կվերադառնա» Սյունիք, Սևան եւ Երևան, հայտնում է Sputnik Азербайджан-ը:

«Նոյեմբերի 10-ի եռակողմ հայտարարության մեջ ասվում է. բոլոր փախստականները պետք է վերադառնան իրենց հայրենի հողերը։ Մեր հայրենի հողերն են Զանգեզուրը (Սյունիք), մեր հայրենի հողն է ՝ Գեյչան (Սևան), Իրևանը (Երևան)։ Մենք, իհարկե, կվերադառնանք», - ասել է Ալիևը:

Նա նաեւ հայտարարել է, որ Բաքուն ոչ պաշտոնական խողովակներով տեղեկատվություն է ստանում այն մասին, որ Հայաստանը պատրաստ չէ խաղաղության պայմանագիր կնքել Ադրբեջանի հետ։ Դա մեծ սխալ է Երևանի համար:

«Ես արդեն բազմիցս արտահայտել եմ իմ կարծիքը ՝ մենք պատրաստ ենք Հայաստանի հետ խաղաղության պայմանագիր ստորագրել։ Պատրաստ ենք սկսել նման աշխատանք. Բայց Հայաստանից արձագանք չկա, պաշտոնական արձագանք չկա»,- ասել է նա: «Եթե Հայաստանը դա չի ուզում, դա իր գործն է։ Բայց նա պետք է լավ մտածի, այլապես հետո ուշ կլինի»,- զգուշացրել է Ադրբեջանի նախագահը:

Ադրբեջանի նախագահը նաեւ ասել է, որ իրենք ամեն պահի պետք է պատրաստ լինեն նոր պատերազմի:

«Մենք կարծում ենք, որ Ղարաբաղյան հակամարտությունը լուծված է։ Պատերազմի շրջանը մնաց անցյալում։ Սակայն, չնայած դրան, մենք ամեն րոպե պետք է պատրաստ լինենք պատերազմի», - ասել է Ալիևը:

Zham.am