Կիվիրյանին բերման են ենթարկել սառը զենք կրելու կասկածանքով

Քիչ առաջ Հյուսիային պողոտայից ոստիկանները բերման են ենթարկել փորձագետ, վերլուծաբան Արգիշտի Կիվիրյանին: 

Բանն այն է, որ Կիվիրյանն արգելել է ոստիկաններին մոտենալ իրեն եւ խուզարկել գրպարնները: Ոստիկանները կրկնել են պահանջը եւ Կիվիրյանի մերժելուց հետո նրան տեղափոխել են ոստիկանություն: 

«Ես ինձ համար քայլում էի Հյուսիսային պողոտայում, մեկ էլ մոտեցան ոստիկանները, թե՝ ստուգելու ենք գրպաններդ: Իսկ ես մերժեցի, թույլ չտվեցի»,- պատմեց Արգիշտի Կիվիրյանը ոստիկանության բաժնից «ԳԱԼԱ»-ի հետ հեռախոսազրույցում:

«Ակնհայտ էր, գիտեին, թե ում են մոտենում, եւ ակնհայտ էր, որ նաեւ պատվեր էին կատարում: Դրանից հետո հենց որ հրաժարվեցի, իրենք անմիջապես վերադասին զեկուցեցին, որից հետո էլ հայտարարեցին, թե ինձ բերման են ենթարկում սառը զենք կրելու կասկածանքով: Ու բերեցին մի խումբ ոստիկաններով Կենտրոնի ոստիկանության բաժին, հիմա գտնվում են Կենտրոնի ոստիկանության բաժնում»:

Մեր այն հարցին, թե ինչ հիմքով էին պահանջում ստուգել գրպանները, ցույց տվեցի՞ն որեւէ փաստաթուղթ կամ ներկայացրի՞ն որեւէ հիմնավորում, Կիվիրյանը պատասխանեց.

«Ակնհայտ էր, որ մոտեցան պատվերով: Գիտեք, մի քանի հոգի են մնացել դրսում իրենց դեմ պայքարող, որոշել են այս կերպ մեկուսացնել բոլորին: Վաղը կմեղադրենք բռնաբարության մեջ, մյուս օրը ատոմային ռումբ սարքելու մեջ, հաջորդ օրը՝ քիմիական զենք փորձարկելու մեջ: Իրենց գործելաոճն է»:

Կիվիրյանն ասաց նաեւ, որ անցած օրերն առանձնակի ակտիվությամբ էլ աչքի չի ընկել, ինչը կարող էր պատճառ դառնալ նրան բերման ենթարկելու համար.

«Գիտեք, մոտ ժամանակներս հարցազրույց եմ տվել հենց ԳԱԼԱ հեռուստաընկերությանը, որտեղ սուր քննադատության են ենթարկել իշխանություններին: Միգուցե դա է ակտիվացրել, պատկերացում անգամ չունեմ»:

Աղբյուր՝ «ԳԱԼԱ»