Րաֆֆի Ասլանյանը փոխադարձ համաձայնությամբ հրաժարվել է Քարահունջի վարչական ղեկավարի շահերի պաշտպանությունից

Փաստբան Րաֆֆի Ասլանյանը փոխադարձ համաձայնությամբ հրաժարվել է Գորիս համայնքի Քարահունջ բնակավայրի վարչական ղեկավար Լուսինե Ավետյանի շահերի պաշտպանությունից: Այս մասին Tert.am-ի հետ զրույցում ասաց ՐաՖֆի Ասլանյանը:

«Էթիկայից ելնելով՝ մանրամասներ հրապարակել չեմ կարող»,-ասաց նա:

Հիշեցնենք, որ Գորիս համայնքի Քարահունջ բնակավայրի վարչական ղեկավար Լուսինե Ավետյանը ձերբակալված է, նրան ընտրական մի շարք հանցագործություններ կատարելու կասկածանք է ներկայացվել:

Ըստ Հատուկ քննչական ծառայության՝ Ավետյանը Քարահունջի 4 բնակիչների այս տարվա մայիսին 100-220 հազար դրամ է փոխանցել ու նրանց հարկադրել մասնակցել «Հայաստան» դաշինքի Գորիսի հանրահավաքին, հետո էլ նրանց ստիպել մասնակցել ընտրություններին ու ընտրել նույն դաշինքին։ Քարահունջի մեկ այլ բնակչի էլ 100 հազար դրամ ֆինանսական աջակցության տրամադրումն է կազմակերպել՝ սոցիալական առողջական խնդիրների լուծման համար, հետո այդ բնակչին ու նրա ամուսնուն գումարը ներկայացրել որպես ընտրակաշառք՝ «Հայաստան» դաշինքնի քարոզարշավին՝ ապա ընտրությանը մասնակցելու դիմաց։