«Ջերմաստիճանը կտրուկ բարձրանալու է». Գագիկ Սուրենյան. Տեսանյութ

Շրջակա միջավայրի նախարարության հիդրոօդերևութաբանության և մոնիթորինգի կենտրոնի տնօրենի տեղակալ Գագիկ Սուրենյանն այսօր մամուլի ասուլիսի ժամանակ մեկնաբանեց հանրապետության տարածքում վերջին շրջանի անոմալ շոգ եղանակը:

«Սովորաբար ամառային սեզոնին Հայաստանի կլիմայական պայմանները ձևավորվում են արևադարձային լայնություններից, հարավից, մասնավորապես՝ Իրաքից և Իրանի շրջաններից ներթափանցող տաք արևադարձային հուսանքներից, որոնց, ըստ օրինաչափության, բուռն ներհոսքը սկսվում է հուլիսից, բայց այս տարի դրանք սկսվեցին հունիսի առաջին տասնօրյակից: Արդյունքում ունեցանք այնպիսի իրավիճակ, որ հունիսի 15-29-ն ընկած ժամանակահատվածում հանրապետության մի շարք շրջաններում առավելագույն ջերմաստիճաններն այդ բոլոր օրերին գերազանցեցին երբևիցե դիտված պատմական առավելագույն արժեքները: Ստացվեց, որ այս տարվա հունիսն օդերևութաբանության պատմության մեջ դարձավ և՛ միջին ջերմաստիճանով, և՛ շոգերի տևողությամբ, և՛ ջերմաստիճանի առավելագույն ցուցանիշներով ամենատաքը»,- ներկայացրեց Սուրենյանը:

Գագիկ Սուրենյանը ներկայացրեց  նաև հուլիս ամսվա կանխատեսումները: Հանրապետության ողջ տարածքում օդի ամսական միջին ջերմաստիճանը նորմայից բարձր կլինի 2-3 աստճանով՝ պայմանավորված օդային տաք հոսանքների ներթափանցմամբ

«Հովտային գոտիներում ամսվա ընթացքում ժամանակ առ ժամանակ առանձին օրերին ջերմաստիճանը կբարձրանա և կհասնի +40, +41 աստիճանի, բայց, ի տարբերություն հունիսի, ամսվա մեջ կունենանք օրեր, երբ կլինի նաև սառը օդային հոսանքների ներթափանցում»,- ասաց նա:

«Հուլիսի 3-4-ն ընկած ժամանակահատվածում սպասում ենք հերթական տաք հոսանքների ներթափանցմանը Իրաքից: Ջերմաստիճանը կտրուկ բարձրանա է»,- հավելեց Սուրենյանը՝ անդրադառնալով նաև առաջիկա օրերի եղանակային կանխատեսումներին:

 Zham.am