Իշխող ուժը ցանկանու՞մ է ազատվել Հայկ Մարությանից

2021 թ. արտահերթ խորհրդարանական ընտրություններից հետո ավելի արդիական դարձավ Երևանի քաղաքապետ Հայկ Մարությանի և իշխող թիմի դիմակայությունը, ինչպես նաև այդ դիմակայության հանգուցալուծումը: Փաստն այն է, որ բուն նախընտրական շրջանում Երեւանի քաղաքապետ Հայկ Մարությանը գործնականում բացակայում էր Նիկոլ Փաշինյանի քաղաքական «front office»-ից: Միայն այս փաստը բավարար էր հասկանալու համար, որ Մարությանի քաղաքական հեռանկարները ընտրություններից հետո շատ անկանխատեսելի և անհասկանալի կլինեին:

Եվ ահա, առաջին արձագանքը չուշացավ. նախկին սուպերնախարար Արայիկ Հարությունյանը «Ազատություն» ռադիոկայանի եթերում «ավետեց» այն ​​մասին, որ Հայկ Մարությանը այլևս չի կարող մնալ քաղաքապետի իր պաշտոնում, մասնավորապես նշել է հետևյալը. «Այո, կուսակցականների շրջանում էլ նման վերաբերմունք կա, և մենք պետք է հասկանանք, թե այս իրավիճակում ինչպես ենք անում, որ և քաղաքական ուժի ներսում տվյալ հարցի հետ կապված ունենանք որոշումներ, բայց դրանից նաև չտուժի քաղաքը և քաղաքային իշխանությունը»:

Եթե ​​այս ամենը թարգմանենք մարդկային լեզվով, ապա  կնշանակի, որ Փաշինյանի թիմի ներսում ցանկանում են անաղմուկ կերպով փոխարինել Մարությանին: Սիմպտոմատիկ է, որ առաջինն այս մասին հայտարարեց Արայիկ Հարությունյանը: Կուլիսներում արդեն ասում են, որ հնարավոր է, որ Մարությանի փոխարեն իշխանությունները բերեն քաղաքապետարան Տիգրան Ավինյանին, Արսեն Թորոսյանը կարող է զբաղեցնել Ավինյանի տեղը, իսկ ահա Արայիկ Հարությունյանը կարող է հայտ ներկայացնել Արսեն Թորոսյանին փոխարինելու համար:

Այս ամենը վկայում է այն մասին, որ Հայկ Մարությանի հեռացման հարցում Արայիկ Հարությունյանը ներկայացնում է կառավարության այն թեւը, որն առավելագույն ջանքեր է գործադրում այս խնդիրը լուծելու համար:

Արտակ Հակոբյան