Հնարավո՞ր էր Վահան Մարտիրոսյանի նման նախաձեռնությունն առանց Հայաստանի իշխանության համաձայնության (տեսանյութ)

«Վահան Մարտիրոսյանի վիդեոհայտարարության մեջ մի կարևոր հատված կա, որը պետք է քննարկման առարկա դառնա:
Մարտիրոսյանն ասում է (վստահ եմ, որ ճիշտ է ասում), որ Հայ-Ադրբեջանական խաղաղության պլատֆորմն ունեցել է հեղինակավոր միջազգային հովանավորներ, որոնց անունները չի նշում:
Նման կարգի միջազգային հանդիպումների իմ անձնական փորձից ելնելով կարծում եմ, որ այդ պլատֆորմն ունեցել է նաև Մինսկի Խմբի աջակցությունը, որն առաջին անգամ չէ, որ նման նախաձեռնություններով է հանդես գալիս:
Անկախ ամեն ինչից, ակնհայտորեն, դա եղել է միջազգային նախաձեռնություն և այժմ էլ Մարտիրոսյանի անվտանգությունն նրանք են ապահովում:
Արդյոք հնարավոր էր նման նախաձեռնություն առանց Հայաստանի իշխանության համաձայնության և անգամ օժանդակության:
Կարծում եմ որ ոչ, որովհետև այդ դեպքում ոչ մի լուրջ միջազգային կառույց դրան չէր աջակցի, առավել ևս Մինսկի Խումբը:
Այստեղից առաջանում են մի շարք հարցեր.

-ինչու էր այդ պլատֆորմը, որը միջազգային լուրջ հովանավորություն ունի, գործում Բաքվում, այսինքն խախտվել էր պարիտետը և նախաձեռնությունն ամբողջովին տրվել էր Ադրբեջանին, ի տարբերություն նախորդ փորձերի,

-ինչու էին Հայաստանի համապատասխան մարմինները, իշխանական լրատվամիջոցները այդքան զուսպ այդ նախաձեռնության հանդեպ,

-ինչ հարց էր ցանկանում լուծել Հայաստանի քաղաքական ղեկավարությունն այդ պլատֆորմի միջոցով,

-ինչ պայմանավորվածություն է խախտվել կամ իրավիճակ է փոխվել, որի պատճառով Մարտիրոսյանը պատրաստվում է հայտարարությամբ հանդես գալ, որն ուղղելու է այդ «հեղինակավոր» միջազգային կառույցներին:

Նաև պետք է ենթադրել, որ ըստ նախնական պայմանավորվածության, պարզ չէ թե Երևանի համաձայնությամբ, թե ոչ, այն պետք է լիներ հասարակական նախաձեռնություն, սակայն հետո վերածվել է ընդամենը Բաքվի հատուկ ծառայությունների միջոցառման, ինչի համար Մարտիրոսյանը խոստացել է բողոքել «միջազգային հանրությանը»»:

Նման տեսակետ է հայտնել քաղաքագետ Ստեփան Դանիելյանը Վահան Մարտիրոսյանի հայտարարության մասին