Ոստիկանությունը դեռ քրեական գործ չի հարուցել Միհրան Հակոբյանի ավտոմեքենայի տակ նռնակ գցելու դեպքի առթիվ. պարզում են հանգամանքները
Ոստիկանությունը պարզում է ՀՀ ԱԺ նախկին պատգամավոր, «Քառյակ Մեդիայի» համահիմնադիր Միհրան Հակոբյանի ավտոմեքենայի տակ նռնակ գցելու դեպքի հանգամանքները։ Այս մասին «Փաստինֆո»-ն տեղեկացավ ՀՀ ոստիկանության հասարակայնության հետ կապերի և լրատվության վարչությունից։
Ավելի վաղ հայտնել ենք, որ Միհրան Հակոբյանի ավտոմեքենայի տակ այսօր առավոտյան նռնակ է հայտնաբերվել։
ՀՀ ոստիկանության Հասարակայնության հետ կապերի և լրատվության պետի տեղակալ Էդգար Ջանոյանը «Փաստինֆո»-ի հարցին ի պատասխան հայտնեց, որ Ոստիկանությունում ահազանգ է ստացվել, հայտնել են, որ Մուրացան 176/1 հասցեում ավտոմեքենայի տակ նռնակ են գցել։
«Ավտոմեքենայի մեջ մարդ չի եղել։ Ըստ նախնական տեղեկությունների՝ տուժած անձինք չկան, հանգամանքները պարզվում են»,- նշեց Ջանոյանը։
Քաղաքագետ Հրանտ Մելիք-Շահնազարյանի փոխանցմամբ՝ «Տեղում աշխատող ոստիկանների նախնական վարկածի համաձայն Միհրան Հակոբյանի մեքենայի վրա ոչ թե ձայնային, այլ հարավսլավական արտադրության մարտական նռնակ է նետվել»:
Հետևեք մեզ Facebook-ում