Նիկոլն այնքան սրիկա է, որ գերիների հարցը ևս օգտագործում է իր անձնական քարոզչության համար. Իշխան Սաղաթելյան

Այս մարդն իր թափած արյամբ դեռ չի բավարարվել։ Փորձելու է ինչ-որ բաներ անել, ինչի մասին վկայում են վերջին ջղաձգումները, բայց կոչ եմ անում հանրությանը լինել հանգիստ ու կազմակերպված։ Դիլիջանում «Փաստինֆո»-ի հետ զրույցի ժամանակ ասաց ՀՅԴ ԳՄ ներկայացուցիչ, «Հայաստան» դաշինքի անդամ Իշխան Սաղաթելյանը։ 

«Մենք թույլ չենք տալու որևէ բախում։ Հայաստանում Նիկոլը չի կարող նոր մարտի 1 կազմակերպել, պարզապես չի ստացվելու։ Ինձ թվում է՝ ինքն այս օրերին ավելի շատ մտածում է Հայաստանից իր փախչելու մասին, այլ ոչ թե այլ բաներ։ Իհարկե, կփորձի վերջին սրիկայությունն անի, բայց մենք էլ պետք է ուշադիր լինենք և թույլ չտանք»,-նշեց Իշխան Սաղաթելյանը։

Դիտարկմանը, որ Նիկոլ Փաշինյանը խոսել է ընտրություններից հետո վենդետաների մասին, եթե կրկին վերարտադրվեն, նման սցենար հնարավո՞ր է, Իշխան Սաղաթելյանը նկատեց՝ նրանց չի հաջողվելու կրկին իշխանության գալ. «Մեր ժողովրդին վիրավորում եք, երբ ասում եք, որ այս իշխանությունը կարող է վերարտադրվել։ Ինքն օգտագործում է հնարավոր ամեն ինչ։ Օրական բազմաթիվ ահազանգեր ենք ստանում մարդկանց աշխատանքից հեռացնելու, ճնշումներ գործադրելու վերաբերյալ»,-ասաց Իշխան Սաղաթելյանը՝ հավելելով, որ բոլոր այն մեծ և փոքր պաշտոնյաները, որոնց քաղաքական հայացքների համար ազատում են աշխատանքից, վերականգնվելու են, իսկ նրանց աշխատանքից ազատողներն օրենքը խախտելու համար պատժվելու են։

Ինչ վերաբերում է վենդետաներին, ապա Իշխան Սաղաթելյանի խոսքով Նիկոլ Փաշինյանն այսօր ՀՀ քաղաքացիներին ընդամենը երկու բան է խոստանում. «Նա չի ասում կկազմակերպեմ Հայաստանի ինքնիշխան տարածքի պաշտպանությունը, ինքն Արցախից չի խոսում, որ նվիրել է իր ավագ եղբորը։ Նա քաղաքացուն ընդամենը երկու բան է խոստանում՝ վենդետա և էլիտաների վերացում։ Ասում է՝ հարուստներին կաղքատացնեմ, իսկ սոցիալապես անապահով մարդիկ էլ ծափահարում են»,-նշեց Իշխան Սաղաթելյանը։

Անդրադառնալով 15 գերիների վերադարձին և Նիկոլ Փաշինյանի այն հայտարարությանը, որ բոլոր գերիներին վերադարձնելու ծրագիր ունի, Իշխան Սաղաթելյանն ասաց, որ գերիների թեման նուրբ է և աշխատում են քիչ կամ ընդհանրապես չխոսել այդ մասին։

Նա նշեց, որ Ռոբերտ Քոչարյանն այս ընթացքում երկու անգամ հանդիպել է գերեվարվածների ծնողներին, բայց այդ մասին չեն բարձրաձայնել. «Նիկոլն այնքան սրիկա է, որ գերիների հարցը ևս օգտագործում է իր անձնական քարոզչության համար, բայց կրկնակի սրիկա է, որ այսօր հայտարարում է, թե ընդդիմությունը սուգ է անում, որ գերիները վերադարձել են։ Այս աստիճանի տականքի հետ գործ ունենք։ Նա չի ասում, թե այդ մարդիկ ինչու են գերի ընկել, չի ասում՝ բա մնացած գերիները։ Այո՛, մենք սգում ենք, որովհետև դեռ գերիներ ունենք, իսկ նա դրա համար պատասխան պետք է տա»,-հավելեց Իշխան Սաղաթելյանը։