Ռոբերտ Քոչարյանը ճիշտ քայլ չի համարում Որոտանի կասկադի վաճառքը

Երկրորդ նախագահ, «Հայաստան» դաշինքի առաջնորդ Ռոբերտ Քոչարյանը ճիշտ քայլ չի համարում Որոտանի ՀԷԿ-երի կասկադի վաճառքը։ Այս մասին նա հայտարարել է Սիսիանի բնակիչների հետ հանդիպման ժամանակ։

Մի սիսիանցի փաստեց, որ Քոչարյանի նախագահության տարիներին էլեկտրաէներգիայի սակագները մնացել են անփոփոխ՝ 25 դրամ ցերեկը եւ 20 դրամ գիշերը։ Որոտանի կասկադը չի վաճառվել եւ արտադրել է ամենաէժան էլեկտրաէներգիան, սպառվող էլեկտրաէներգիայի մոտ 25-30 տոկոսը։

«Շնորհակալություն, որ հիշեցրիք սակագները։ Իմ նախագահության շրջանը կայուն սակագների շրջան էր»,- համաձայնեց Քոչարյանը։ Նրա խոսքով՝ Որոտանի կասկադը կարգավորող դեր էր խաղում։ «Չեմ կարծում, թե ճիշտ էր (վաճառելը – խմբ.)։ Մենք հատուկ հանել էինք այն վաճառքի օբյեկտների ցուցակից։ Չեմ կարծում, թե դա ճիշտ քայլ էր։ Հիմա պետությունը զրկված է գնագոյացման վրա ազդելու եւ կարգավորող դեր խաղալու հնարավորությունից»,- նշել է Քոչարյանը։ Հիշեցնենք, որ կասկադը վաճառվել է ամերիկյան կողմին Սերժ Սարգսյանի նախագահության օրոք։

Ակնարկին, թե հիմա էլեկտրաէներգիան կրկնակի թանկ է, նախկին նախագահն արձագանքեց. հիմա ամեն ինչ կրկնակի թանկ է։ «Եվ այն ժամանակ միջին աշխատավարձը ավելացել էր 5 անգամ։ Հիմա հազար դրամ ավելացնում են եւ անվերջ խոսում։ Տատս հավեր ուներ։ Ձու ածելու ժամանակ հավն այնքան էր ծղրտում, ողջ աշխարհին հայտարարում։ Սրանք էլ են այդպես. մի փոքր բան են անում, բայց այնքան են խոսում... Երբ մարդ կյանքում ոչ մի բան չի ստեղծել, մի լուցկի է արտադրում ու կարծում է, որ անհավանական մի բան է արել։ Դուք նայեք, թե ուրիշներն ինչ են անում»։

Աղբյուր՝ NEWS.am