Արտակ Թովմասյանը դիմել է Վլադիմիր Պուտինին՝ խնդրանքով մանրամասն ուսումնասիրել իրավիճակը հայ-ադրբեջանական սահմանին

«Երրորդ ուժ» քաղաքացիական նախաձեռնության նախագահ Արտակ Թովմասյանը դիմել է ՌԴ նախագահ Վլադիմիր Պուտինին՝ խնդրանքով մանրամասն ուսումնասիրել իրավիճակը հայ-ադրբեջանական սահմանին:

Ուղերձում, մասնավորապես, ասվում է.

«Հարգարժան Վլադիմիր Վլադիմիրովիչ,

Առաջին հերթին, թույլ տվեք երախտագիտություն հայտնել Ձեզ այն ուշադրության համար, որը հատկացնում եք շատ տարածաշրջանններում խաղաղ բնակչության պաշտպանության համար:

Ցավոք, միջազգային խախտված իրավակարգի պայմաններում շատ դեպքերում Ռուսաստանի հաշտեցնող քաղաքականությունը միշտ չէ, որ ցանկալի արդյունք է տալիս: Սակայն մենք չենք կորցնում Ադրբեջանի հետ մեր կոնֆլիկտի խաղաղ լուծման հույսը: Այսօր Ադրբեջանը՝ ցուցադրաբար հայտարարելով խաղաղությանը կողմնակից լինելու մասին, օգտվում է Հայաստանում ստեղծված ներքաղաքական վիճակից, փորձում Ձեր միջնորդությամբ նախաձեռնված միջնորդական գործընթացները խախտել եւ խաղաղ նախաձեռնության մեջ ռազմական բաղադրիչ մտցնել:

Ձեզ, անկասկած, զեկուցում են, որ Ադրբեջանը միակողմանի կարգով նախաձեռնել է հայ-ադրբեջանական սահմանի «դեմարկացիա»: Հայաստանի տարածքում զորքերի տեղակայումն ուղեկցվում է քաղաքացիական եւ ռազմական անձանց գերեվարմամբ, այլ բացահայտ թշնամական գործողություններով եւ հայտարարություններով, ներառյալ՝ բարձր մակարդակով հայտարարություններով:

Ադրբեջանը մտածված նախաձեռնում է ուժային հակամարտություն: Դժվար է գնահատել հնարավոր ողբերգության մասշտաբները, որը կարող է տեղի ունենալ Ադրբեջանի սադրանքների արդյունքում:

Հայաստանի տարածքում գտնվող զինված անձինք մշտապես տեղաշարժվում են սահմանի պարագծով, որը բաց է Թուրքիայի տարածքից ներթափանցման համար: Մարդկանց գերեվարումը, խցիկներում խոշտանգումները, սոցցանցերում քարոզչական նպատակով վիրավորանքները կարող են հանգեցնել լայնամասշտաբ բախումները:

Հարգարժան Վլադիմիր Վլադիմիրովիչ, դիմում եմ Ձեզ՝ խնդրանքով ավելի մանրամասն ուսումնասիրել իրավիճակը հայ-ադրբեջանական սահմանին, որտեղ իմ խորին համոզմամբ ՌԴ ռազմական զորախմբի մեծացման դեպքում հնարավոր է կանխել նոր բախումներն ու արնահեղությունը:

Հավատում եմ Ձեր իմաստությանն ու խորաթափանցությանը»: