Մեր հայրենիքը այս վիճակից կարող է հանել Ռոբերտ Քոչարյանի գլխավորած կառավարությունը. ԱԱԾ պահեստազորի սպաների միությունը
Մեր հայրենիքը ստեղծված ծանր իրավիճակից կարող է հանել, ոտքի կանգնեցնել, ազգային խարխլված արժանապատվությունը վերականգնել Ռոբերտ Քոչարյանի գլխավորությամբ կազմվելիք կառավարությունը: Այս մասին հայտարարություն է տարածել ԱԱԾ պահեստազորի սպաների միությունը, որի ներկայացուցիչներն այսօր հանդիպել են ՀՀ նախագահ Արմեն Սարգսյանի հետ:
Նրանց տարածած հայտարարությունում ասվում է. «Հունիսի 4-ին կայացավ «ԱԱԾ պահեստազորի սպաների միություն» հասարակական կազմակերպության խորհրդի, ապաև ակտիվի ընդլայնված նիստը, առաջիկա խորհրդարանական ընտրության հետ կապված՝ ձայների զգալի մեծամասնությամբ հստակեցվեց կառույցի դիրքորոշումը։ Փաստելով, որ ընտրություններում պիտի պահպանվի ժողովրդի ազատ կամարտահայտման իրավունքը, բացառվեն վարչական ռեսուրսի օգտագործումը, հնարավոր ընտրախախտումները, ապահովվի ընտրական ողջ գործընթացի թափանցիկությունը, գտնում ենք, որ
1․ այս իշխանությունները Նիկոլ Փաշինյանի գլխավորությամբ չպետք է վերարտադրվեն, քանի որ նրանց ապիկար կառավարման արդյունքում անդառնալիորեն խարխլվել են մեր պետականության հիմքերն ու երկրի անվտանգային համակարգը,
2․ երկրի իրական ընդդիմության դերում տեսնում ենք ՀՀ երկրորդ նախագահ Ռոբերտ Քոչարյանի գլխավորած «Հայաստան» և ՀՀ ԱԱԾ նախկին տնօրեն Արթուր Վանեցյանի գլխավորած «Պատիվ ունեմ» դաշինքները,
3․ մեր հայրենիքը ստեղծված ծանր իրավիճակից կարող է հանել, ոտքի կանգնեցնել, ազգային խարխլված արժանապատվությունը վերականգնել Ռոբերտ Քոչարյանի գլխավորությամբ կազմվելիք կառավարությունը։