Լիովին համաձայն եմ, որ ԿԳՄՍ նախարարությունը պետք է բաժանվի. Այսօր մենք լրջագույն խնդիր ունենք կրթության ոլորտում՝ եւ կառավարման, եւ բովանդակային առումով: Այս մասին նախօրեին Կոտայքի մարզի քաղաքացիների եւ «Հայաստան» դաշինքի ակտիվի հետ հանդիպման ժամանակ նշեց ՀՀ երկրորդ նախագահ, «Հայաստան» դաշինքը գլխավորող Ռոբերտ Քոչարյանը:
«Կրթությունը ոչ միայն պետք է գիտելիքների ինչ-որ մի ծավալ տա երեխաներին, կամ ուսանողներին, այլ պետք է նաեւ քաղաքացի դաստիարակի: Երեխան միայն ընտանիքում չի դաստիարակվում, այլ նաեւ փողոցում: Հիմա եթե մենք հետեւողականորեն կրթությունից ուզում ենք հանել ազգային բաղադրիչը, հայ լինելու հանգամանքը, ապա ստացվում է, որ մենք ուղղակի ինչ-որ գիտելիքների ծավալ ենք տալիս, բայց քաղաքացի չենք դաստիարակում: Սա խնդիրներից մեկն է»,-ասաց նա:
Քոչարյանի խոսքով, այն, ինչ արվեց կրթության հետ այս վերջին տարիներին ոչ լուրջ պակաս աղետ է. «Հոգեբանական ներգործություն էր մեր ազգային ինքնության զգացողության վրա: Ես երբ նախագահ էի դարձել, ուսուցչի աշխատավարձը մոտ 15 հազար դրամ էր, միանգամից սարքեցինք 78-80 հազար դրամ: Դու չես կարող 5 հազար դրամ տալ ուսուցչին եւ ակնկալել ինչ-որ բան: Պետությունն ուրիշ ձեւ չունի գնահատելու, միակ ձեւը այն աշխատավարձն է, որը տալիս է, այն արտոնություններն են, որոնք տալիս է:
Այո, եթե կրթությունը մեզ համար կարեւոր է, ուրեմն պետք է այն ըստ արժանվույն գնահատվի: հետո, մեզնից ոչ մեկը չի կարող կրթությունը շրջանցել: Չես կարող ասել՝ ես կապ չունեմ: Երեխա ունես, թոռ ունես, մեկ է, մտնելու է այդ հաստատությունը եւ ուղղակի իր վրա ազդեցություն է ունենալու կրթության մակարդակը»:
Ռոբերտ Քոչարյանը հվելեց, որ այս ոլորտում լրջագույն բարեփոխումների կարիք կա. «Մենք անելու ենք, եւ ԿԳՄՍՆ-ն պետք է վերանայվի: Ես շշմած էի, որ մշակույթի նախարարությունն ուղղակի վերացրեցին: Ուրեմն այս մարդկանց համար մշակույթը կարեւոր չի: Բացատրություն չկա: Դե հիմա մուղամ լսեք, սրան են հասցրել»,-ընդգծեց նա:
Հետևեք մեզ Facebook-ում