Քուրդ բնակչություն ունեցող երկրների շարքում Հայաստանը բացառիկ երկիր է

Երեկ Հայաստանի խորհրդարանում, ըստ էության, տեղի ունեցավ պատմական նշանակալի իրադարձություն: Մեր տարածաշրջանում թվաքականակով ամենամեծ պետականազուրկ ժողովրդի՝ քրդերի ներկայացուցիչը բացեց և նախագահեց մեր պետության օրենսդիր բարձրագույն մարմնի առաջին նիստը:

Փաստորեն հենց նույն այն ժամանակ, երբ քրդերը մի կողմից աննախադեպ քաղաքական հալածանքների են ենթարկվում Թուրքիայում, իսկ մյուս կողմից Սիրիայում և Իրաքում ներքաշված են պատերազմական գործողությունների մեջ, Հայաստանի քրդական համայնքի ղեկավար Կնյազ Հասանովը մեր երկրի քաղաքական ամենաբարձր ամբիոնի լիիրավ պատասխանատուն էր:

Հայերի և քրդերի բազմադարյա հարևանության պատմությունն անցել է զանազան վայրիվերումներով՝ քրդական որոշ աշիրեթների Հայոց ցեղասպանության ամոթալի իրադարձությանը մասնակից լինելուց ընդհուպ մինչև հայ-քրդական գործակցություն Թուրքիայի ներսում քրդական ապստամբությունների շրջանակում:

Քուրդ բնակչություն ունեցող երկրների շարքում Հայաստանը մեր տարածաշրջանում բացառիկ երկիր է՝ ազգային իրական հանդուրժողականության կղզյակ, ինչը մեկ անգամ ևս ապացուցվեց մեր խորհրդարանի երեկվա նիստում՝ հանգամանք, որը պետք է գիտակցեն և որպես ելակետ ընդունեն անխտիր բոլոր քրդական հասարակական-քաղաքական շրջանակները:

Իրանագետ Վարդան Ոսկանյանի ֆեյսբուքյան էջից