Դա, ըստ էության, գերեվարում չէ, մեր զինվորներին առևանգել են մեր տարածքից. Փաշինյան. Տեսանյութ
Նիկոլ Փաշինյանն այսօր կառավարության նիստին հայտարարեց, որ միջադեպ է տեղի ունեցել հայ-ադրբեջանական սահմանին: Հայ վեց զինծառայողներին գերեվարելը Փաշինյանը միջադեպ անվանեց` ներկայացնելով, թե ինչ է տեղի ունեցել:
Ըստ նրա` հայ զինծառայողները սահմանին ականապատման աշխատանքներ են իրականացրել, որոնք զուգորդվել են զգուշացնող նշանների տեղադրմամբ:
«Դրանից հետո տարածվեց տեղեկատվություն, որ մեր հայ զինվորները գերեվարվել են, գերեվարման հանգամանքները դեռ, իհարկե, պետք է պարզվեն, բայց դա, ըստ էության, գերեվարում չէ, այլ տեղի է ունեցել մեր զինծառայողների առևանգում ՀՀ տարածքից»,-ասաց Նիկոլ Փաշինյանը:
Նա նաև հիշեցրեց, որ մայիսի 11-ից այդ տարածքում գտնվում են ադրբեջանական զորքեր, ինչը մեզ համար անընդունելի է, և այս կարգի միջադեպերը տեղի են ունենում նրա համար, որ ոմանք ուզում են այնպես անել, որ մենք համակերպվենք մեր տարածքում ադրբեջանական ուժերի ներկայության հետ, ինչը տեղի ունենալ չի կարող:
Հետևեք մեզ Facebook-ում