Դա միակ փաստաթուղթն է, չկա և չի կարող լինել գաղտնի հավելված. Նիկոլ Փաշինյանը՝ եռակողմ փաստաթղթի մասին. Տեսանյութ
Ասք այն մասին, թե ինչպես իրեն ընդդիմություն հորջորջող որոշակի շրջանակներ ամեն ինչ անում են, որ ադրբեջանական զորքը հանկարծ չլքի ՀՀ տարածքը: Այս մասին այսօր Ազգային ժողովում իր ելույթում ասաց Նիկոլ Փաշինյանը:
«Իմ գնահատականը շարունակում է մնալ այն, որ Ադրբեջանի գործողությունների նպատակը սահմանային ռազմական բախում հրահրելն է»,-ասաց նա: Նիկոլ Փաշինյանը կառավարության աշխատանքը գնահատեց թիմային, համակարգված և արդյունավետ, քանի որ միջազգային հանրությունում իրավիճակի վերաբերյալ, ըստ նրա, կա համաձայնություն, որով արձանագրվում է Ադրբեջանի գործողությունների ապօրինությունը:
«Մեր դիրքորոշումը շարունակում է մնալ այն, որ առանց նախապայմանների Ադրբեջանի զորքերը պետք է լքեն ՀՀ սահմանը: Կա փաստ, որ չունենք դելիմիտացված և դեմարկացված սահման»,-ասաց նա և նշեց, որ եռակողմ հանձնաժողով ձևավորելու առաջարկ կա:
«Ես կոռեկտ չեմ համարել, որ աշխատանքային փաստաթուղթը, որը դեռ քննարկումների փուլում է, հրապարակվի, դա վատ ու անլուրջ վիճակի մեջ կդնի որևէ կառավարության, բայց քանի որ հրապարակված է ընդդիմության կողմից, ապա ասեմ, որ այո, դա միակ և եզակի փաստաթուղթն է, որը օր ու կես, երկու օր գտնվում է մեր աշխատանքային շրջանառության մեջ»,-ասաց նա և նշեց, որ դրա մեջ ամենակարևորն այն է, որ կողմերը պարտավորվում են, որ սահմանային իրադրությունը լուծվում է դիվանագիտական քաղաքական ճանապարհով:
Նիկոլ Փաշինյանը նշեց, որ դա կլինի այն դեպքում, երբ ադրբեջանական ուժերը կլքեն ՀՀ տարածքը, կամ կարձագրեն մի դրույթ, որտեղ նշված կլինի զորքերի հետքաշման գործընթացի մասին: «Սա է, ըստ էության, ամբողջ պատմությունը, չկա և չի կարող լինել գաղտնի հավելված: Սա ինքնին աշխատանքային գաղտնի փաստաթուղթ է: Պետք է հասկանանք, որ մենք բոլորս շատ լարված ենք և շատ ծանր ճանապարհի միջով ենք անցել և անցնում, բայց դա չի նշանակում, որ պետք է պարզ բաներ չնկատենք»,-ասաց նա:
Ինչ վերաբերում է ԱԳ նախարարի՝ փաստաթղթից տեղյակ չլինելուն, Փաշինյանն ասաց՝ այդ փաստաթղթերը ստանում են ԱԳՆ խողովակներով. «Մենք թաքցնելու որևէ բան չունենք»:
Մանրամասները՝ Tert.am-ի տեսանյութում
Հետևեք մեզ Facebook-ում