«Իմ տեղեկությունով՝ Ռուսաստանը Հայաստանին առաջարկել է ստեղծել եռակողմ հանձնաժողով»․ Լիլիթ Մակունց
«Նախ նշեմ, որ վարչապետն այլ շեշտադրումներով է խոսել 100 տոկոսով Հայաստանի շահերից բխող որևէ փաստաթղթից։ Նա նշել է, որ եթե բավարարվեն պայմանները, ապա այդ դեպքում որևէ հարց դիտարկելը կարող է 100 տոկոսով բխել Հայաստանի շահերից։ Այստեղ կարևոր է արձանագրել պայմանները, որոնց ընդունումը, իրհարկե, պարտադիր է»,- այսօր՝ լրագրողների հետ ճեպազրույցում, անդրադառնալով Նիկոլ Փաշինյանի հայտարարությանը, ասաց «Իմ քայլը» խմբակցության ղեկավար Լիլիթ Մակունցը։
«Իմ տեղեկությունով՝ ռուսական կողմը Հայաստանին առաջարկ է ներկայացրել ստեղծելու համատեղ եռակողմ հանձնաժողով՝ քննարկելու դելիմիտացիայի և դեմարկացիայի հարցեր։ Կրկին իմ տեղեկությունով՝ հայկական կողմն արձագանքել է, որ ցանկացած հարց, աշխատանքային խումբ ստեղծելու կամ դրա քննարկման հնարավորություն կարող է լինել միայն այն պարագայում, եթե Ադրբեջանի զինված ուժերն ամբողջությամբ լքեն ՀՀ տարածքը»,- ընդգծեց Մակունցը։
Հիշեցնենք՝ Կառավարության նիստի ժամանակ վարչապետի պաշտոնակատար Նիկոլ Փաշինյանը հայտարարել էր. «Այն լուծումները, որոնք այս պահին մեր միջազգային գործընկերների հետ ձեռք են բերված նախնականում, 100 տոկոսով համապատասխանում են ՀՀ շահերին: Այո, եթե Ադրբեջանը էդ պայմանավորվածություններն իրագործի ու էն պայմաններում, ինչ որ խոսել ենք, ես այդ թուղթը ստորագրելու եմ: Ես դա չեմ հրապարակի, որովհետև կոռեկտ չէ՝ աշխատանքային թուղթ է, բանակցություններ են ընթանում և այլն»:
Հետևեք մեզ Facebook-ում