«Երեւի իմ ձայնը քաղցր ա հնչում, հա՞». Ռուբեն Հայրապետյան

«Հրապարակ» թերթը գրում է. «Երեկ տեղեկություն ստացանք, որ Ֆուտբոլի ֆեդերացիայի նախկին նախագահ եւ ՀՀԿ-ական նախկին պատգամավոր Ռուբեն Հայրապետյանը ֆինանսապես աջակցում է Արամ Զավենի Սարգսյանին։ Նրանք վաղեմի բարեկամներ են, բայց աջակցելու պատճառներից մեկն էլ այն է, որ կանխեն Արամ Սարգսյանի միանալն Արման Բաբաջանյանի կամ Նիկոլ Փաշինյանի հետ։ Պայմանը միայնակ մասնակցելն է։ Բնականաբար, այս պրոյեկտին իր հավանությունն է տվել ՀՀԿ առաջնորդ Սերժ Սարգսյանը։ Ռ․ Հայրապետյանը տեւական ժամանակ է՝ ապրում է Մոսկվայում․ նրա նկատմամբ հետախուզում է հայտարարված, սակայն ռուս իրավապահներն անցած տարվա ամռանն իրենց տարածքում դադարեցրել են նրա նկատմամբ հետախուզումը։

Երեկ մենք կապվեցինք նրա հետ եւ հարցրինք, թե ինչ կարող է ասել առաջիկա ընտրությունների մասին, կա՞ մի քաղաքական ուժ, որին աջակցելու է։ «Դուք իմ կուսակցական պատկանելությունը, կարծեմ, գիտեք։ Իսկ Դուք երբեւիցե լսե՞լ եք, որ ես դավաճանություն եմ արել․․․ բա ինչի՞ եք նման հարց տալիս էդ դեպքում»,- նեղսրտեց նա։ Ասացինք, որ ուզում էինք իրենից լսել այդ մասին։ «Ուղղակի երեւի իմ ձայնը քաղցր ա հնչում, հա՞»,- ասաց նա եւ հրաժարվեց այլ հարցերի պատասխանել»:

Մանրամասները՝ թերթի այսօրվա համարում