Հայաստանն այսօր ձախողված պետություն է և դադարել է միջազգային իրավունքի սուբյեկտ լինելուց. Արտակ Զաքարյան. Տեսանյութ
Կապիտուլյանտի համար ամոթ, պատվախնդրություն, արժանապատվություն հասկացություններ գոյություն չունեն, մեր պետության սահմանների հետ վարվում են ուզածի պես. Սյունիքն արցախյան պատերազմի անմիջական հետևանքն է և վերջին արարը չէ, սա մի բարձունքի համար մղվող բախում չէ, այլ՝ աշխարհաղաքական մեծ խաղի տարածաշրջանային հետևանք, որում մեր շահերն իբրև մանրադրամ դրված են սեղանին: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել ՀՀ պաշտպանության նախկին փոխնախարար Արտակ Զաքարյանը:
«ՀՀ տարածքային ամբողջականություն հասկացությունը սնանկ է։ Արցախյան պատերազմի ավարտից և կապիտուլյացիոն հայտարարությունից հետո փոխվեց աշխարհաքաղաքական վեկտորի հաջորդ թիրախը, Սյունիքը դարձավ Թուրքիայի նպատակը։ Թուրքիան մասնակցեց պատերազմին՝ պայմանով, որ հաջորդ քայլն Ադրբեջանի հետ Սյունիքով հաղորդակցությունն է, ապա դրա հայաթափումը։ Թուրքիան դրանով իրացնում է իր պանթուրքական նպատակը Հայաստանի ազգային շահերի հաշվին»,- ասել է քաղաքական գործիչը:
Ըստ Զաքարյանի՝ անգամ բարեկամ երկրի կողմից որևէ ապօրինի սահմանախախտում ենթակա է անհապաղ քրեական հետապնդման, մինչդեռ Անվտանգության խորհուրդն այս վիճակում ոչինչ չի ասում. «Զանգում են ՌԴ ՊՆ և ԱԳՆ, ո՞ւր է ՀՀ-ն։ Մինչև 2018-ն այնպիսի քաղաքական և ռազմավարական պաշար էր ստեղծվել, որ մեզ հետ հաշվի նստելով՝ փորձում էին բանակցել։ Այսօր ադրբեջանցի զինվորը, առանց վախենալու, կարող է հանձնարարություն կատարել ՀՀ տարածքում, միևնույն է՝ Երևանը որևէ գործողություն չի ձեռնարկում, իսկ մտահոգ քաղաքացիներին պիտակավորում են»:
Քաղաքական գործչի կարծիքով՝ սուտը և կեղծիքը պաշտոնականացված և լեգալացված են, իշխանությունները ստում են և՛ ներսում, և՛ միջազգային հանրության հետ շփումներում. «ՀՀ-ն մեր աչքի առաջ աստիճանաբար կործանման է գնում։ Այսօր արդեն ձախողված պետության կարգավիճակին շատ մոտ ենք, երբ միջազգային իրավունքի սուբյեկտ լինելու մասին պետք է մոռանալ։ Սյունիքն ունի ռազմավարական նշանակություն, թուրք-ադրբեջանական տանդեմը վերցնում է բոլոր հանգուցային կետերը, որ վաղը, երբ ՀՀ-ն ոտքի կանգնի և պատրաստ լինի իր համար շահեկան իրավիճակ ապահովելու, մենք լինենք բացասական տիրույթում, բոլոր բարձունքները, կոմունիկացիաները, ճանապարհները, ջրային ռեսուրսները հանձնված լինեն»:
Արտակ Զաքարյանի պնդմամբ՝ թշնամին Սյունիքն առնում է աքցանի մեջ, ինչի արդյունքում ՀՀ-ն դառնում է հաշմանդամ պետություն։
«Մենք անգամ ամենափոքր հարցերում այսօր զրոյական դերակատարում ունենք, մեր ճակատագիրն այլևս կախված է օտար հանգամանքներից։ Մենք իրավունք ունենք մտածելու, որ Փաշինյանը և իր կառավարությունը՝ կապիտուլյանտները, բավարարել են տարածաշրջանային խաղի առաջին մասը, հիմա ամեն կերպ կառչած են իշխանությանը, որ բավարարեն նաև Թուրքիայի շահերը։ Եթե նրանք հրաժարական տային և հեռանային՝ կանխելով հետագա զիջումները, կմտածեինք, որ սխալվել են, բայց նույնիսկ Արցախում տեղի ունեցածը շատերի համար դաս չի եղել, իսկ Փաշինյանը նենգաբար շարունակում է մոլորեցնել շատերին»,- ամփոփել է Արտակ Զաքարյանը:
Հետևեք մեզ Facebook-ում