«Չնայած բարդությանը` ԼՂ-ում սահմանների հետ կապված խնդիրները լուծելի են». Լավրովը՝ Ալիևի հետ հանդիպմանը

Ռուսաստանի Դաշնության արտաքին գործերի նախարար Սերգեյ Լավրովն Ադրբեջանի նախագահ Իլհամ Ալիևի հետ հանդիպման ընթացքում հայտարարել է, որ չնայած բարդությանը՝ Լեռնային Ղարաբաղի տարածաշրջանում սահմանների հետ կապված խնդիրները լուծելի են, գրում է «Ռեգնում»-ը:

«Այժմ մենք պետք է զբաղվենք «ցամաքի» մանրամասներով: Կան սահմանազատումներ (դեմարկացիա) և սահմանագծումներ (դելիմիտացիա): Ամեն ինչ պարզ չէ, բայց, մեր համոզմամբ, ամեն ինչ լուծելի է: Ռազմական փորձագետները դիվանագետների մասնակցությամբ կարող են համաձայնության գալ փոխընդունելի լուծումների շուրջ»,- շեշտել է Լավրովը:

Ինչպես ավելի վաղ տեղեկացրել էր Tert.am-ը, Ռուսաստանի արտգործնախարար Սերգեյ Լավրովը երեկ մեկնել է Բաքու, որտեղ երկօրյա այցի շրջանակում նախատեսված են մի շարք հանդիպումներ՝ Լեռնային Ղարաբաղում իրավիճակը քննարկելու համար:

Ռուսաստանի ԱԳՆ պաշտոնական ներկայացուցիչ Մարիա Զախարովան այս առնչությամբ շեշտել էր, որ Ադրբեջանի ղեկավարության հետ հանդիպումներում նախատեսվում է դիտարկել երկկողմ և տարածաշրջանային համագործակցության, ինչպես նաև միջազգային ասպարեզում փոխգործակցության հարցերի լայն շրջանակ:

Հիշեցնենք, մայիսի 5-6-ը Սերգեյ Լավրովը Երևանում էր, որտեղ հանդիպումներ է ունեցել Նիկոլ Փաշինյանի և ՀՀ ԱԳ նախարարի պաշտոնակատար Արա Այվազյանի հետ:

Աղբյուր՝ Tert.am