Մեր առաջնագիծն ուղիղ Ադրբեջանի տեսադաշտում է. Նրանք շատ լավ տեսնում են՝ որտեղ ինչ պաշտպանվածություն ունենք. Թագուհի Թովմասյանը՝ Նիկոլ Փաշինյանին. Տեսանյութ
Պատերազմից մոտ կես տարի է անցել, բայց մենք չունենք կահավորված առաջնագիծ, խրամատներ և մեր անվտանգությունը մեղմ ասած մտահոգիչ վիճակում է գտնվում։ ԱԺ հատուկ նիստի ժամանակ այս մասին ասաց անկախ պատգամավոր Թագուհի Թովմասյանը՝ դիմելով ՀՀ վարչապետի պաշտոնակատար Նիկոլ Փաշինյանին։
Պատգամավորը հետաքրքրվեց՝ ի՞նչ խոչընդոտներ ունենք և ինչ է սպասվում մեզ մինչև սահմանային վերջնական ճշգրտումները։ Թագուհի Թովմասյանի այս հարցը բարկացրեց Նիկոլ Փաշինյանին, ով նկատեց՝ Ադրբեջանի հետախուզությունը շատ փող ծախսելու անհրաժեշտություն չունի. «Մեկը կար չէ, որ պատերազմից առաջ ասում էր՝ ես լինեմ Ալիևի տեղը այ հիմա կհարձակվեմ։ Հիմա մենք ճշգրտում ենք՝ որտեղ ինչ կա։ Մյուս անգամ հրապարակեք որ կոորդինատներում չունենք խրամատներ, որտեղ ենք ուժեղ, որտեղով չարժի հարձակվել։ Մենք հասկանում ե՞նք՝ ինչ ենք անում»,-ասաց Նիկոլ Փաշինյանը։
Թագուհի Թովմասյանն էլ հակադարձեց՝ մեր առաջնագիծը գտնվում է ուղիղ Ադրբեջանի տեսադաշտում, և նրանք շատ լավ տեսնում են ամեն ինչ. «Այստեղ որևէ կոորդինատի հարց չկա։ Ես որևէ ռազմական գաղտնիք չբացահայտեցի, ընդամենը հարցրեցի, թե ինչու է մեր պաշտպանական համակարգն այդ վիճակում գտնվում։Ես բարձրաձայնում եմ մտահոգությունս այն մասին, որ Ադրբեջանն ուղիղ տեսնում է՝ մենք որտեղ ինչ կահավորվածություն ունենք, որտեղ ինչ պաշտպանվածություն ունենք, մեր զինվորի արտահագուստը։ Էդ ի՞նչ գաղտնիք բացահայտեցի»,-ասաց պատգամավորը։
Նիկոլ Փաշինյանն էլ հավաստիացրեց, որ ոչ միայն ադրբեջանցիները, այլև հենց պատգամավորը չեն կարող տեսնել այն ամենը, ինչն արվում է, քանի որ այդ ամենի մեծամասնությունը գաղտնի է արվում. «Այն առաջնագիծը, որը տեսանելի է, մատչելի է, ուրեմն դա վատ առաջնագիծ է։ Փառք Աստծո ո՛չ դուք, ո՛չ էլ ադրբեջանցիները չեք կարող դա տեսնել, և ես ուրախ եմ դրա համար»,-ասաց վարչապետի պաշտոնակատարը։
Մանրամասները՝ Pastinfo.am-ի տեսանյութում:
Հետևեք մեզ Facebook-ում