Հերմինե Նաղդալյանը ԵԽԽՎ-ին հորդորել է վերադառնալ Թուրքիայում մոնիտորինգի գործընթացի վերականգնման առաջարկին

Հունվարի 27-ին ԵԽԽՎ ձմեռային նստաշրջանի ավարտին՝ ազատ բանավեճի ձեւաչափում , ՀՀ ԱԺ եւ ԵԽԽՎ փոխնախագահ, ԵԽԽՎ-ում հայկական պատվիրակության ղեկավար Հերմինե Նաղդալյանը Վեհաժողովի քարտուղարությանն է փոխանցել իր ելույթը, որտեղ ԵԽԽՎ-ին կոչ է արել վերականգնել Թուրքիայում մոնիտորինգի գործընթացը:

Իր ելույթում հայկական պատվիրակության ղեկավարը մտահոգիչ է համարել Թուրքական ժողովրդավարական ինստիտուտների վիճակը եւ այդ երկրում ընթացող հակաժողովրդավարական գործընթացները, որոնք ԵԽԽՎ-ի «թեժ» թեմաներից են:

«Ցավոք, մեր գործընկերների կողմից նախորդ քննարկումներին արտահայտված կարծիքները հաշվի չեն առնվել, եւ Թուրքիայի մոնիտորինգի ընթացակարգի վերաբացման առաջարկները մերժվել են, մինչդեռ դա կարող էր կանխարգելիչ ազդեցություն ունենալ երկրում ժողովրդավարական ազատությունների կոպիտ խախտումների դեմ», - ելույթում ընդգծել է տիկին Նաղդալյանը՝ հավելելով, որ Թուրքիան Հայաստանի անմիջական հարեւանն է, եւ Հայաստանը մտահոգվելու բոլոր պատճառներն ունի:

Անդրադառնալով թուրքական վարչակարգի՝ հարեւանների հետ հարաբերություններում հակաժողովրդավարական պահվածքին, անտեսելով ստանձնած միջազգային պարտավորությունները՝ Հայաստանի հետ սահմանը 25 տարի փակ պահելու փաստին, տիկին Նաղդալյանը աբսուրդ է որակել նման քաղաքականությունը՝ այսօրվա «առանց սահմանների» աշխարհում:

«Ի՞նչ է կատարվում մերօրյա Թուրքիայում: «Զուգահեռ պետության» , ինչպես Թուրքիայում անվանում են Գյուլենական շարժումը, որոնումների ու վնասազերծման անվան տակ՝ շարունակվում են զանգվածային ձերբակալությունները: Կարծում եմ՝ հասկանում եք՝ ինչ է սպառնում այդ մթնոլորտում ձերբակալված ու աշխատանք կորցրած մարդկանց: Ներկայումս տասնմեկ պատգամավորներ են ձերբակալվել եւ դատապարտվել երկարաժամկետ ազատազրկման» ,- փաստել է տիկին Նաղդալյանը՝ միաժամանակ խիստ մտահոգիչ համարելով ԶԼՄ-ների եւ անհատ լրագրողների ճակատագիրը:

Այս համատեքստում տիկին Նաղդալյանը հիշեցրել է բոլորովին վերջերս Թուրքիայի խորհրդարանում խոսքի ազատության ու ընդդիմադիր պատգամավորների անձեռնմխելիության ոտնահարման ցայտուն դրսեւորումը, երբ հայ պատգամավորը զրկվեց երեք նիստի մասնակցելու հնարավորությունից, միայն այն բանի համար, որ խորհրդարանում հնչեցրեց «հայոց ցեղասպանություն» բառը ու կոչ արեց անցյալի հետ առերեսվել:

«Այն ամենը, ինչ կատարվում է Թուրքիայում՝ ազգային փոքրամասնությունների, ազգայնականության զարթոնքի, կառավարման համակարգում բռնապետության հաստատման, պատերազմի ու խաղաղության միջակայքում գոյության հետ կապված , ստիպում են հիշել 100 տարի առաջվա իրադարձությունները, երբ զոհը հայերն էին եւ այլ քրիստոնյաները, այժմ՝ քրդերը:

ԵԽ պահանջները Թուրքիային բնավ էլ արտառոց չեն՝ հարգանք ժողովրդավարական արժեքների, ազգային փոքրամասնությունների, մարդու իրավունքների նկատմամբ, արտառոցը՝ Թուրքիայի իշխանության վերաբերմունքն է այդ պահանջներին», - իր ելույթը եզրափակել է ՀՀ ԱԺ փոխխոսնակը ՝ Վեհաժողովին հորդորելով վերադառնալ Թուրքիայում մոնիտորինգի գործընթացի վերականգնման առաջարկին, որին միացել են եվրոպացի բազմաթիվ պատվիրակներ: