«Փաշինյանի վզին դրած է. նրա մոտ չի ստացվի Պուտինի գլխի վրայից թռնել». Տիգրան Քոչարյան. Տեսանյութ

Մեդիափորձագետ Տիգրան Քոչարյանի կարծիքով՝ արտահերթ խորհրդարանական ընտրությունները կենաց-մահու պայքար են լինելու:

«Հասարակությունը պետք է ընտրի իր մոտակա զարգացումը՝ 5-10 տարվա կտրվածքով, այսինքն՝ մենք գնում ենք դեպի թրքացո՞ւմ, Հայաստանն ընտրում է Աջարիայի ճանապա՞րհ, որն առաջարկում է Նիկոլ Փաշինյանը, թե՞ անկախությունը պահպանելու և հետագայում զարգանալու ճանապարհը: Այլ երրորդ ճանապարհ չկա»,- 168TV-ի «Ռեվյու» հաղորդման ընթացքում ասաց նա:

Տիգրան Քոչարյանի խոսքով՝ Նիկոլ Փաշինյանն ընտրություններին մասնակցելու է նույն սկզբունքով, ինչպես պատերազմի առաջին օրը հայտարարեց խորհրդարանում, որ՝ եկեք պայմանավորվենք, որ ինչ էլ լինի՝ մեզ պարտված չենք ճանաչի. «Բայց այստեղ մի խնդիր կա․ կան որոշ գործընթացներ, որոնց վրա Նիկոլ Փաշինյանը չի կարող ազդել: Կա աշխարհաքաղաքական կոնսենսուս, որ, օրինակ՝ Հայաստանում պետք է լինեն ընտրություններ: Այն, որ ապրիլի 24-ին Նիկոլ Փաշինյանը զանգահարեց Վլադիմիր Պուտինին և իր հրաժարականի տեքստը երևի ներկայացրեց, դա արդեն նշանակում էր, որ ինչ էլ փորձի անել, ընտրություններ լինելու են: Մենք գիտենք, որ Նիկոլ Փաշինյանն ամեն առիթ ման էր գալիս, որպեսզի ընտրություններ չլինեն, քանի որ շատ լավ հասկանում է, որ նախկին էյֆորիան չկա, և ինքը նույնիսկ կարող է պարտվել այդ ընտրություններում»:

Հարցին՝ այսինքն՝ Պուտի՞նն է որոշելու, թե ով պետք է լինի Հայաստանի հաջորդ վարչապետը, թե՞ ընտրողները, նա պատասխանեց. «Ռուսաստանի մոտեցումը հետևյալն է. ոչ Հայաստանի հետ կապված Պուտինն ասել էր, որ իրենց համար հեղաշրջումը, ֆիզիկական վերացումն ընդունելի չէ, որովհետև ինքը շատ լավ գիտի, որ եթե Ռուսաստանն այդ ճանապարհով սկսի հարցեր լուծել հարևանների մոտ, մի օր էլ Ռուսաստանում այդպես հարցեր կլուծեն, և նա սահմանում է տվյալ տարածաշրջանում խաղի կանոններ, որտեղ Ռուսաստանը գերիշխող դեր ունի, և, ամեն դեպքում, վերջնարդյունք տվողը էլի Ռուսաստանն է: Մենք տեսանք, որ առանց ԱՄՆ-ին ու Ֆրանսիային հարցնելու՝ Ռուսաստանը խաղաղապահներ մտցրեց, ոչ էլ Փաշինյանին հարցրեց, որովհետև համարեց, որ ռուսական շահերի խնդիր կա, և ինքն է տարածաշրջանում թելադրելու՝ ինչպես, ոնց: Ինքն ասում է՝ գնացեք ընտրության և սահմանադրական ճանապարհով փոխում եք, չեք փոխում, ստացվում է, չի ստացվում, ինչ ուզում եք՝ արեք: Այսինքն՝ ինքը ոչ թե որոշում է՝ ով է լինելու, այլ ասում է՝ ես հետևելու եմ, որ հանկարծակի սխալ խաղեր, կեսից թռնել, պայմանավորվածությունները խախտել չլինի: Բայց այսպես ասեմ՝ Փաշինյանի մոտ չի ստացվի Պուտինի գլխի վրայից թռնել»:

Նրա հիշեցրեց՝ պայմանավորվածություն կար, որ Փաշինյանը պետք է գնա արտահերթ ընտրությունների, Փաշինյանը կես տարվա ճանապարհային քարտեզ էր հրապարակել, բայց կեսից որոշեց խախտել իր տված խոստումը. «Բայց աշխարհաքաղաքական խաղացողներն ասացին՝ տղա ջան, ասել ես՝ կանես: Ինչ-որ շարժ եղավ դաշտում, որից հետո Փաշինյանը երդում կերավ, որ ընտրությունները հունիսի 20-ին լինելու են, և այդ շարժից հետո ես համոզված էի, որ Փաշինյանն այլևս չի թռնելու իր ասածից, եթե այլ բաներ չլինեն, և ինքը գնաց ընտրությունների, որովհետև հասկացավ, որ ինքը խախտում է այն խաղի կանոնները, որոնց համաձայնել են աշխարհի մեծերը: Ի՞նչ պայմաններում նա կարող է դրժել իր տված խոստումը. Եթե հանկարծակի ինչ-որ քայլ արվի, որը նախագծած պրոցեսից դուրս լինի, և ինքը դրանից բռնվի, ասի՝ տեսեք, ես համաձայնել էի, իրենք չուզեցին: Քայլ լինի, օրինակ՝ խորհրդարանական ընդդիմության կողմից:

Կոպիտ ասած՝ պայմանավորվածություն կա, որ ընդդիմությունը վարչապետի թեկնածու չի առաջադրելու, և ՔՊ-ն էլ չի առաջադրելու, և այդպես կլուծարվի խորհրդարանը: Եթե ընդդիմությունը թեկնածու առաջարկեց, ապա փաշինյանենք կառաջարկեն Փաշինյանին, նա կընտրվի, և 1 տարի իրեն հնարավոր չի լինի պարտադրել՝ հրաժարական տալ: Այսինքն՝ այսպես նա կարող է երկարացնել»:

Հարցին՝ կարո՞ղ է ընտրությունների կասեցման տարբերակ լինել Սյունիքում հնարավոր պատերազմը, նա պատասխանեց. «Հայաստանի և Արցախի անվտանգության հարցերը լուծում է Ռուսաստանը: Եթե ինչ-որ մեկն ուզում է Հայաստանի հետ խնդիր ունենալ, ինքը Ռուսաստանի հետ է խնդիր ունենալու, այսինքն՝ ով քեզ պաշտպանում է, ինքն էլ քեզ պարացնում է: Եթե ինչ-որ մեկը խնդիր ունի Սյունիքի հետ, ինքը խնդիր ունի ոչ թե Նիկոլ Փաշինյանի կառավարության կողմից պաշտպանվող ՀՀ մարզի հետ, այլ Ռուսաստանի բանակի, կոպիտ ասած՝ Վլադիմիր Պուտինի հետ:

Կարող են երկրում ներքին պրոցեսներ հրահրվել՝ տեռորիստական ակտ, խժդժություններ, և ասի՝ ես տանում էի արտահերթի, այստեղ ինչ-որ մեկը որոշեց իր խաղերն իրականացնել: Կարող է մտացածին մահափորձ արվել. Ես ուղղակի նշում եմ, թե աշխարհում ինչ տարբերակներ կան, որպեսզի ընտրական պրոցեսը զրոյացվի, և մարդու իշխանությունը ևս որոշ ժամանակով երկարացվի: Բայց էլի եմ ասում՝ Փաշինյանի վզին դրած է, որ արտահերթ ընտրությունները լինելու են, և եթե դու որևէ բան ունես ապացուցելու, կապացուցես արտահերթ ընտրություններով»:

Մեդիափորձագետի դիտարկմամբ՝ այս ընտրություններին կուսակցությունների միավորման դեպքում գումարվում է ոչ թե նրանց ռեյտինգը, այլ անտիռեյտինգը. «Եթե «ա» կուսակցությունը ունի 10 տոկոս ռեյտինգ և 90 տոկոս հակառեյտինգ և միավորվի «բ» կուսակցությանը, որն ունի 90 տոկոս ռեյտինգ, 10 տոկոս հակառեյտինգ, միավորումը ունենալու է 10 տոկոս ռեյտինգ, որովհետև մարդիկ, ովքեր զզվում են «ա» կուսակցությունից և երկրպագում են «բ» կուսակցությանը, ընտրությանը չեն ընտրելու այդ բլոկը, որովհետև իրենք ավելի շատ զզվում են, քան սիրում:

Այստեղ հաշվարկ է պետք՝ արդյո՞ք որոշ կուսակցությունների պետք է միավորվել, թե՞ ոչ, օրինակ՝ ԲՀԿ-ն պե՞տք է միավորվի ՀՀԿ-ի հետ, թե՞ ոչ, կամ Քոչարյան դաշինքը պե՞տք է միավորվի Արթուր Վանեցյանի հետ, թե՞ ոչ: Հաշվարկներ պետք է արվեն, և դրանք ցույց են տալիս, որ որոշ պարագաներում միասնական ճակատով հանդես գալն ավելի շատ սխալ է: Նույնը Փաշինյանի պարագայում է»:

Մանրամասները՝ 168TV-ի տեսանյութում