Կարեն Կարապետյանը կրկին նախատեց նախարարներին եւ հանձնարարեց օպտիմալացնել դպրոցները

ՀՀ կառավարության այսօրվա նիստում վարչապետ Կարեն Կարապետյանը, դիմելով գործադիրի անդամներին, նշեց, որ շատ ժամանակ իր հանձնարարականները թերի են կատարվել:

Ըստ այդմ, նա հանձնարարեց հանձնարարականները կատարել օրենքի տառին համապատասխան, ապա կառավարության աշխատակազմի ղեկավար – նախարար Դավիթ Հարությունյանին հանձնարարեց քննարկում կազմակերպել և ներկայացնել արդյունքները:

Այնուհետեւ Կարեն Կարապետյանն անդրադարձավ կրթական հաստատությունների օպտիմալացման խնդրին: Վարչապետի խոսքով՝ կառավարության անդամները բազմիցս բարձրաձայնել են, որ իրենց համար ամենակարեւոր հարստությունը մարդկային կապիտալն է, որի զարգացման համար անհրաժեշտ է մասնագիտական պատշաճ պատրաստվածություն եւ համակողմանի զարգացվածություն ապահովող կրթական համակարգ:

«Մեր երկրի կրթական համակարգ պետք է ապահովի միջազգային ասպարեզում մրցունակ մասնագետներ, որոնք կապահովեն մեր երկրի զարգացումը: Ակնհայտ է, որ անհրաժեշտ են կառուցվածքային եւ բովանդակային բարեփոխումներ եւ հանրակրթությունում եւ միջին մասնագիտական կրթության համակարգում»,- ասաց վարչապետն ու կրթության եւ գիտության նախարարին հանձնարարեց 15-օրյա ժամկետում կառավարության աշխատակազմ ներկայացնել քաղաքային դպրոցների օպտիմալացման առաջարկությունները՝ հաշվի առնելով ուսուցիչների օպտիմալ ծանրաբեռնվածությունը:

Zham.am