Կա որոշակի միտում՝ ՀՀ-ն բաժանելու մասերի. Մակունց

«Եթե Սյունիքում վարչապետի այցի ընթացքում տեղի ունեցածը ոմանք մեկնաբանում են որպես քաղաքական ակցիա, ապա ես կարծում են, որ դրանք ակցիաներ էին՝ ուղեկցված խուլիգանական դրսևորումներով»,- այս մասին ԱԺ-ում լրագրողների հետ զրույցում ասաց «Իմ քայլը» խմբակցության ղեկավար Լիլիթ Մակունցը։

Լրագրողի այն դիտարկմանը, որ մարդիկ դժգոհելու առիթ չունեն, որ տուն են կորցրել՝  Մակունցն ասաց, որ դժգոհելու առիթ միշտ կա, լինելու է բոլոր իշխանությունների պարագայում։

«Հարցն այն է, որ կա որոշակի միտում՝ ՀՀ-ն բաժանելու մասերի և դա նկատվում է ուղղորդված խմբակների կողմից, որը չի կարող ընդունելի լինել որևէ երկրի քաղաքական ղեկավարության և իրավապահ համակարգի կողմից», - ասաց նա։

Թե ո՞վ է միտումնավոր պառակտում երկիրը, Մակունցն ասաց, թե չի կարող անուններ հնչեցնել, որովհետև չգիտի, բայց որպես կողքից դիտող նման տպավորություն է ստացել։ Համաձայն չէ նաև, որ պատռակտման սերմեր ցանողները այսօրվա իշխանություններն են։

«Մեր գործողություններով մենք որևէ կերպ չենք փորձել և միտում չենք ունեցել տարանջատելու հասարակությանը՝ հակառակը։ Վերջին ամիսների ընթացքում ՀՀ իշխանության գործողությունները որևէ կերպ չեն մղել քաղաքացիներին, քաղաքական-հասարակական խմբերին ձեռնարկելու նման գործողություններ», - ասաց Լիլիթ Մակունցը։

Աղբյուր` Փաստինֆո