Պարգեվատրվեցին Արցախյան պատերազմի մասնակից ուսանողները

Ճարտարապետության  և շինարարության Հայաստանի ազգային համալսարանի (ՃՇՀԱՀ) շատ ուսանողներ պատերազմի օրերին իրենց ուսանողական լսարանները փոխարինեցին խրամատներով հանուն մեր երկրի պաշտպանության։ Բարձր գնահատելով ուսանողների հայրենանվեր գործը համալսարանի ռեկտորատի որոշմամբ՝ ճարտարապետության, շինարարության, դիզայնի, քաղաքային տնտեսության և էկոլոգիայի, կառավարման և տեխնոլոգիաների ֆակուլտետների, ինչպես նաև ՃՇՀԱՀ-ի քոլեջի՝ ընդհանուր առմամբ 185 ուսանողներ պարգևատրվեցին ճարտարապետության և շինարարության Հայաստանի ազգային համալսարանի պատվոգրերով։

«Համալսարանի ողջ աշխատակազմի անունից շնորհակալություն եմ հայտնում մեր հայրենիքի պաշտպանության գործում ունեցած ձեր յուրաքանչյուրի ավանդի և ներդրման համար։ Անկախ այն բանից թե ո՞վ ո՞ր հատվածում է գտնվել՝ հաց է հասցրել խրամատ թե առաջնագծում է կռվել, մեր համար մեր բոլոր տղերքը հերոսներ են։ Կյանքում ոչ մի հաղթանակ կամ պարտություն հավերժ չի լինում։ Վստահ եմ, որ մեր ժողովուրդը հաղթահարելու է այս փորձությունը և մենք ձեր հետ միասին՝ ձեր սերունդը կառուցելու է այն Հայաստանը, որի մասին երազել են մեր նախնիները, ինչպիսին ուզում ենք տեսնել մենք բոլորս։ Մեր ժողովուրդը միշտ հաղթահարել է դժվարությունները և բոլոր ժամանակներում հաղթահարողը եղել է երիտասարդությունը։ Մենք մեր հերթին ամենինչ անելու ենք, որպեսզի ձեզ պատշաճ, բարձր մակարդակով կրթություն ապահովենք, որպեսզի ձեր նման տղաները՝ մեր ուսանողությունը հնարավորինս ավելի լավ և բարձր որակի կրթություն ստանա»,- պատվոգրերը հանձնելուց առաջ իր ելույթում ասաց ՃՇՀԱՀ-ի ռեկտոր Եղիազար Վարդանյանը։ Նա առանձնակի շնորհակալություն հայտնեց ուսանող-զինվորների ծնողներից, հայրենասեր որդիներ դաստիրակելու համար։

Պատվոգրերի հանձման սկզբում՝ խոնարհումով և մեկ րոպե լռությամբ հարգեցին 44 օրյա պատերազմի ընթացքում հերոսաբար ընկած զինվորների հիշատակը։

ՃՇՀԱՀ-ի մամուլի քարտուղար Ժասմին Վիլյան