Փաշինյանն ընդունել է Ռուսաստանի Դաշնության գլխավոր դատախազ Իգոր Կրասնովին

Նիկոլ Փաշինյանն ընդունել է աշխատանքային այցով Հայաստան ժամանած Ռուսաստանի Դաշնության գլխավոր դատախազ Իգոր Կրասնովին: 

Փաշինյանը ողջունել է ՌԴ գլխավոր դատախազի այցը Երեւան եւ վստահություն հայտնել, որ այն կնպաստի երկու երկրների գլխավոր դատախազությունների միջեւ համագործակցության հետագա զարգացմանն ու ամրապնդմանը: Նիկոլ Փաշինյանը կարեւորել է երկու իրավապահ մարմինների սերտ փոխգործակցությունը հանցավորության դեմ պայքարում եւ առկա մարտահրավերներին դիմակայելու գործում: Կառավարության ղեկաբարը բարձր է գնահատել Իգոր Կրասնովի ջանքերը պատերազմի հետեւանքով Ադրբեջանում գտնվող հայ ռազմագերիների, պատանդների եւ պահվող անձանց հետ վերադարձի ապահովման ուղղությամբ: Այս գործում ներդրվող ավանդի, իրականացվող քայլերի, ինչպես նաեւ իրավապահ բնագավառում արդյունավետ համագործակցության համար Նիկոլ Փաշինյանն Իգոր Կրասնովին հանձնել է շնորհակալագիր:

ՌԴ գլխավոր դատախազը շնորակալություն է հայտնել վարչապետին բարձր գնահատանքի համար եւ նշել, որ հայ գործընկերների հետ համագործակցությունը կրում է վստահելի բնույթ: Իգոր Կրասնովի խոսքով՝ երկու երկրների գլխավոր դատախազությունները գտնվում են մշտական կապի մեջ, ինչը նպաստում է հանցավորության դեմ պայքարում արդյունավետ համագործակցությանը: ՌԴ գլխավոր դատախազը կարեւորել է 2020 թվականի նոյմբերի 9-ի եռակողմ հայտարարության 8-րդ կետի լիարժեք իրագործման անհրաժեշտությունը, ըստ որի` պետք է տեղի ունենա ռազմագերիների, պատանդների եւ պահվող այլ անձանց փոխանակում: ՌԴ գլխավոր դատախազն ընդգծել է, որ այդ ուղղությամբ իր ջանքերը կրում են շարունակական բնույթ եւ կանի ամեն ինչ՝ խնդրի լուծման նպատակով: 

Փաշինյանը նշել է, որ ՀՀ կառավարությունը առանձնակի կարեւորում է Ռուսաստանի Դաշնության հետ ռազմավարական համագործակցության շարունակական զարգացումը երկարատեւ համատեքստում ու այդ առումով արդյունավետ գնահատել ՌԴ նախագահ Վլադիմիր Պուտինի հետ ապրիլի 7-ին ունեցած բանակցությությունների արդյունքները: