Պեսկովը ներկայացրել է Պուտինի ու Փաշինյանի առաջիկա հանդիպման մանրամասները

Նիկոլ Փաշինյանը Մոսկվայում ապրիլի 7-ին հանդիպում կունենա Ռուսաստանի Դաշնության նախագահ Վլադիմիր Պուտինի հետ: Ինչպես հաղորդում է «TASS»-ը, այս մասին հայտնել է ՌԴ նախագահի խոսնակ Դմիտրի Պեսկովը:

«Ապրիլի 7-ին նախատեսված է  Նիկոլ Փաշինյանի աշխատանքային այցը Մոսկվա: Տեղի կունենան բանակցություններ նախագահ Պուտինի հետ: Դուք գիտեք, որ Ռուսաստանի և Հայաստանի միջև ամենաբարձր մակարդակով ակտիվ երկխոսություն է ընթանում: Նախ և առաջ, իհարկե, քննարկվելու է եռակողմ պայմանավորվածությունների ու եռակողմ փաստաթղթի կյանքի կոչման ընթացքը, որը վերջ տվեց ռազմական գործողություններին Ղարաբաղում»,- ասել է Պեսկովը:

Նա հայտնել է, որ Պուտին-Փաշինյան հանդիպման ընթացքում քննարկվելու են հարցեր՝ կապված Անդրկովկասում տրանսպորտային ենթակառուցվածքների ապաշրջափակման հետ, տեղի կունենա մտքերի փոխանակում Հայաստանում սկսված ընտրական գործընթացի, ինչպես նաև ռուս-հայկական համագործակցության ակտուալ հարցերի շուրջ:

Նիկոլ Փաշինյանի՝ Մոսկվա մեկնելու մասին հայտարարել էր նաև  Փաշինյանի մամուլի խոսնակ Մանե Գևորգյանը՝ ապրիլի 2-ի առավոտյան: Փաշինյանն անցել է ինքնամեկուսացման ռեժիմի՝ աշխատելով պլանային օրակարգով, բացի անձնական ընդունելություններից եւ հանրային միջոցառումներից:

Zham.am