Հնգյակի ընտանիքին կտրամադրվի 7.5 մլն դրամ (տեսանյութ)

Այսօր՝ մայիսի 3-ին, առավոտյան ժամը 4:00-ին մոտ, Երեւանի «Էրեբունի» բժշկական կենտրոնում հնգյակ է ծնվել՝ 4 աղջիկ եւ 1 տղա:

Armtimes.com-ի թղթակիցն այս պահին գտնվում է «Էրեբունի» ԲԿ-ում, որտեղ մի շարք մանրամասներ է պարզել նորածինների ծնողների եւ նրանց վիճակի մասին:

Հայրը՝ Վարդան Կարապետյանը, 24 տարեկան է, մայրը՝ Լուսինե Պողոսյանը, 23 տարեկան:

Վարդանը մեր թղթակցին հայտնել է երեխաների անունները՝ Արա, Աննա, Լիլիթ, Թեհմինե, Ռոզի: Նորածիններից միայն մի աղջիկ է գտնվում է «Էրեբունի» ԲԿ-ում մյուսները տեղափոխվել են տարբեր այլ հիվանդանոցներ: Հայրն առայժմ տեսել է միայն նրան, մյուս չորսին չի հասցրել տեսնել: «Անունները ընտրել ենք, բայց դեռ չենք բաշխել, չգիտենք, որը որն է»,- մեր թղթակցի ասել է Վարդանը:

Հարազատները նշում են, որ թե մայրը, թե նորածինները լավ են, թեեւ բժիշկները առայժմ մեր թղթակցի հետ զրույցում չեն գնահատել երեխաների եւ մոր վիճակը: Հայտնի է, որ ամենափոքրիկ երեխայի քաշը մոտ 600 գրամ է: Մյուսները կշռում են 700-ից մինչեւ 950 գրամ:

Ինչպես մեր թղթակցին փոխանցել է նորածինների տատիկը՝ Ռոզա Կարապետյանը, իրենք ապրում են Մեծամորում` հանրակացարանում: Տատիկը, պապիկը, Վարդանն ու իր կինը, Վարդանի փոքր եղբայրը եւ, փաստորեն նաեւ նրանց հինգ երեխաները՝ 10 հոգի:

Տիկին Ռոզայի փոխանցմամբ՝ հանրակացարանի 4-րդ հարկում իրենց տունն է՝ 16 քմ տարածքով, իսկ 5-րդ հարկում վարձել են երկու սենյականոց բնակարան:

Ընտանիքի միակ կերակրողը նորածինների երիտասարդ հայրն է, որ ստանում է 100 հազար դրամ աշխատավարձ: Վարդանի հայրը որոշել է անցնել պայմանագրային զինծառայության:

Մանրամասները՝ Armtimes.com-ում:

Մինչ այդ Panorama.am-ը հայտնում է Աշխատանքի և սոցիալական հարցերի նախարարության արձագանքը. «Մեծամորցի նորածիններից յուրաքանչյուրի համար ծննդյան կապակցությամբ կտրամադրվի 1,5 մլն դրամ: Այսինքն՝ ընտանիքը կստանա 7.5 մլն դրամ, որից՝ 2,5 մլն դրամնն ուղղակիորեն կտրամադրվի ծնողներին, իսկ մնացածը 5 մլնը կփոխանցվի յուրաքանչյուր երեխայի անվամբ բացված ընտանեկան դրամագլխի հաշվին, յուրաքանչյուրին՝ 1 մլն դրամ»:

Լուսանկարը՝ Panorama.am-ի

Տեսանյութը՝ Shamshyan.com-ի