ՊԵԿ-ն անցել է ռեստորաններին․ տուգանքներով ուզում են բյուջե լցնել

Ռեստորանների հայկական միությունը ահազանգում է, որ Պետական եկամուտների կոմիտեն ահռելի մասշտաբներով չհիմնավորված ստուգումներ է ստուգել ռեստորանային բիզնեսի ոլորտում․

«Միությունը իր խորին մտահոգությունն է հայտնում վերջին շաբաթներին ՀՀ Պետեկամուտների կոմիտեի, ի մասնավորի՝ հարկային մարմինների կողմից հանրային սննդի ոլորտի ձեռնարկություններում ծավալած աննախադեպ, շատ դեպքերում չհիմնավորված և օրենքի խախտումներով իրականացվող ստուգումների, օպերատիվ միջոցառումների, ոլորտի աշխատողների հարցաքննությունների կապակցությամբ։

Լինելով օրինապահ և բարեխիղճ հարկատուներ, Ռեստորանների հայկական միության անդամ կազմակերպություններ մշտապես կանգնած են եղել պետության կողքին և թիկունքին, հատկապես դժվարին ժամանակներում և իրենց նշանակալի ներդրումն ունեն տնտեսության զարգացման եւ Հայաստան աշխարհին լավագույնս ներկայացնելու գործում։

Ռեստորանների հայկական միությունը խրախուսել եւ ողջունել է հարկային բնագավառում իրականացվող բարեփոխումները եւ կոչ է անում պատկան մարմիններին չվերադառնալ նախկինում կիրառված ռեպրեսիվ մեթոդներին»:

Մենք զրուցեցինք միության ղեկավար Վահե Գևորգյանի հետ, ով նշեց, որ վերջին 2 շաբաթների ընթացքում ՊԵԿ-ը ամեն ինչ անում է ռեստորաններում խախտումներ հայտնաբերելու համար․

«Խոսքն այն մասին է, որ մեր միության անդամ կազմակերպությունները երբևէ չեն խուսափել, կամ խնդիրը ստուգումների հարցի մեջ չէ, այլ այն է, որ դրանք տարատեսակ և աննախադեպ ծավալ են ստացել վերջին մի քանի շաբաթների ընթացքում, և երբեմն, շատ դեպքերում․․․, երբ ասում ենք` չհիմնավորած, նկատի ունենք, որ եթե կազմակերպությունը պարտաճանաչ հարկատու է և այդպիսի վարքագիծ է դրսևորել, ապա վերջին տարիների բարեփոխումների արդյունքում այդպիսի կազմակերպությունները ավելի քիչ են ստուգվել, որովհետև իրենց՝ նախկինում դրսևորած վարքագիծը չի բերել այն կասկածներին, որոնք սովորաբար ստուգումների հիմքում են լինում։ Բացի դրանից, չպլանավորված են և նույն կազմակերպությանը տարբեր ուղղություններով են ստուգում, ՀԴՄ կտրոնների մասով․․․, բավականին էժանագին մեթոդներով փորձում են․․․, այսինքն՝ նույն կազմակերպությունում մի քանի բան կարող են պատվիրել, ՀԴՄ կտրոն ստանալ, վերջին պատվերը տալիս գումարը դնեն, դուրս գան, որպեսզի չհասցնի այդ ՀԴՄ-ն տպվի, այսպիսի պրիմիտիվ բաներ։ Նախկին աշխատակիցներին են հրավիրում, փորձում են ինչ-որ․․․։ Տպավորությունն այնպիսին է, որ փորձում են անպայման ինչ-որ բացասական ինֆորմացիա հավաքել այն կազմակերպությունների դեպքում, որոնք մշտապես իրենց պարտականությունները կատարում են և խնդիրներ չեն հարուցել, և մեր հիմնական վրդովմունքը դրա հետ է կապված, որ դա աննախադեպ երևույթ է։ Մենք վերջին տարիներին շատ ողջունել ենք, որ այդ հարկարարությունը բիզնեսին խրախուսող կամ բիզնեսի հետ համագործակցող տեսքով է եղել, և հիմա գտնում ենք, որ դրան պետք է ժամանակին արձագանքենք, որպեսզի խնդիր չառաջանա»,- ասաց Գևորգյանը։ 

Գևորգյանն ասաց, որ 1-2 անհատական դեպքերին սովորաբար միությունը չի էլ արձագանքում, բայց ՊԵԿ-ի այս գործելաոճը մեծ ծավալներ է ստացել․

«Միությունը ներկայացնում է մի քանի հարյուր ռեստորաններ և սրճարաններ, Հայաստանում գործող լավագույն բրենդների մեծամասնությունը, դրանք և՛ ցանցեր են, և՛ անհատ ռեստորաններ, սրճարաններ են, այդ թիվը մոտ 300 է։ Երբ անհատական դեպքեր են, չենք էլ արձագանքում, բայց մեր խորհրդի նիստի ժամանակ հասկացանք, որ տասնյակ կազմակերպություններ են ենթարկվում այդպիսի աննախադեպ ծավալի և տարբեր, չընդհատվող ստուգումների։ Սովորաբար եթե մի ստուգումը սկսվում է, դա չավարտած` այլ ստուգում չի նախաձեռնվում, բայց երբ կազմակերպությունները բարեխիղճ հարկատուներ են և տեսնում են, որ մի ուղղությամբ չի ստացվում խախտում հայտնաբերել, մյուս ուղղությամբ են փորձում, մենք համարում ենք, որ դա վերադարձ է որոշակի ռեպրեսիվ մեթոդների, դա մեզ համար անհասկանալի է»։

Գևորգյանին հարցրինք՝ միայն ստուգո՞ւմ են, թե՞ տուգանում էլ են:

«Դեռևս իրենք չեն հասել ինչ-որ արդյունքի կամ արձանագրման, մենք այս հայտարարությունը որպես նախազգուշացում ենք անում, որպեսզի այդ տիպի ստուգումները դադարեն, որովհետև մենք համարում ենք, որ սա շատ վատ պրակտիկա է, եթե հանկարծ շարունակվի, և, բնականաբար, մեր իրավունքները պաշտպանելու հարցում վճռական կլինենք»։