Վանդալիզմ՝ Երևանում. 15-ից ավելի ծաղկած ծիրանենի են կտրել
Մինչ Երևանի քաղաքապետ Հայկ Մարությանն ու վարչական շրջանների ղեկավարները ամպագոռգո հայտարարում են, թե կենացմահու պայքար են տանելու մայրաքաղաքում ծառահատումների դեմ, Երևանի Շենգավիթ վարչական շրջանում՝ Արտաշատի խճուղում, անհայտ անձը կամ անձինք 15-ից ավել ծաղկած ծիրանենիների համատարած սպանդ են իրականացրել:
Ինչպես հայտնում է shamshyan.com-ը, բնության նկատմամբ հերթական վանդալիզմ իրականացնողները քոքից կտրել են 30, 20, 10, 5 տարեկան ծաղկած ծիրանենիներ և թթենիներ: Թե ով է այս անմարդկային արարքի հեղինակը, երևի դրա պատասխանը միայն Երևանի քաղաքապետարանն ունի: Մի քաղաքացի, երբ նկատեց, որ այդ ամենը տեսանկարահանում ենք, ասում էր. «2 օր առաջ մեկը եկել, ասում է՝ էս տարածքն իմն է, պիտի սաղ ծառերը կտրեմ, տեղը օբյեկտ քցեմ: Զանգահարեցինք Երևանի քաղաքապետարան՝ ոչ մի դրական արդյունք: Մեր աղմուկից հետո ծառասպանները իրենց սև գործը կիսատ թողեցին ու հեռացան, սակայն ոչ մի երաշխիք չկա, որ հետ չեն վերադառնա, որպեսզի ավարտին հասցնեն իրենց սև գործը»:
Հետևեք մեզ Facebook-ում