Քաղաքական դաշտում ձևավորվել է երկու ոչիշխանական ուժային կենտրոն՝ մեծ ներուժով

Երեկ Հայաստանի քաղաքական դաշտում երկու կարևոր իրադարձություն տեղի ունեցավ։ Երեք ընդդիմադիր կուսակցություններ՝ «Համախմբումը», «Երրորդ Հանրապետությունը» և Դեմոկրատական կուսակցությունը հայտարարեցին միասնական դաշինքով ընտրություններին մասնակցելու մասին։ Իսկ այն փաստը, որ մինչ այդ «Համախմբում» կուսակցության նախագահ Վարդան Օսկանյանը քննարկում է ունեցել պաշտպանության նախկին նախարար Սեյրան Օհանյանի հետ և այդ հանդիպումը հրապարակայնացվել է, վկայում է այն մասին, որ ամենայն հավանականությամբ առաջիկայում այդ թիմում կտեսնենք նաև Սեյրան Օհանյանին։

Մյուս կարևոր իրադարձությունը Գագիկ Ծառուկյանի՝ ակտիվ քաղաքականություն վերադառնալու մասին հայտարարությունն էր։ Չնայած սովորական դարձած խոսակցություններին այն մասին, թե իբր դա «հերթական խաղն է», ուղղորդվում է հայտնի կենտրոնից, ակնհայտ է, որ Ծառուկյանն ինքնուրույն ֆիգուր է և գործում է անկախ։ Նա այսօր ունի բոլոր հնարավորությունները՝ իր շուրջը հավաքելու փոփոխության ձգտող անհատներին և ուժերին և լուրջ դիմադրություն ցույց տալ իշխանությանը։

Այդ պոտենցիալն ունի նաև Սեյրան Օհանյանը։ Եվ այսպիսով՝ քաղաքական դաշտում ձևավորվել է երկու ոչիշխանական ուժային կենտրոն՝ մեծ ներուժով։ Այս պայմաններում կարևոր է, որ այս ուժերը կարողանան միմյանց չհակադրվելով գործել հասարակության շահերից և զրկեն արդեն իսկ պառակտման եզրին կանգնած ՀՀԿ-ին քաղաքական մենաշնորհից։

Անկասկած, մեր քաղաքական դաշտում էլի կան մարդիկ, որոնք հետապնդում են նույն այդ նպատակը, սակայն իրենց ուժով միայնակ զիջում են այս երկու կենտրոններին։ Ժամանակն է, որ նրանք մի կողմ դնեն քաղաքական ամբիցիաները, գոնե այս պահին և կատարելով հասարակության պահանջը՝ միավորվեն և ընտրություններին դիմադրություն ցույց տան իշխանության կեղծարար մեքենային։

Սա է գերնպատակը՝ վերացնելով քաղաքական մենաշնորհը Հայաստանը տանել զարգացման ճանապարհով։ Միջոցն էլ գալիք ընտրություններն են և միասնական պայքարը։ Հասարակության գերակշիռ մեծամասնությունը պատրաստ է դրան, մնում է, որ ոչիշխանական քաղաքական ուժերը հասկանան դա և միասնական ճամբարով ներկայանան հասարակությանը, հստակեցնելով փոփոխության հասնելու և գերնպատակն իրականացնելու ճանապարհը։

Անդրանիկ Վարդանյանի ֆեյսբուքյան էջից