Ո՞ր կազմակերպությունն է պատասխանատու Հալիձոր-Սատանի կամուրջ-Տաթև ճանապարհի ձմեռային սպասարկման համար

Հետպատերազմյան երկու տարում, որ նշված ճանապարհը փոխարինում է թուրքերի կողմից օկուպացված Մ-2 մայրուղուն, ձմեռային շահագործման համար պատասխանատուն «Ոսմար» ՍՊ ընկերությունն էր:

Եվ, հանուն ճշմարտության նշենք, վատ չէր սպասարկում (ականջդ կանչի Նելսոն Ոսկանյան)...

Այս տարվա սկզբին փոխվեց «Ոսմար»-ի սեփականատերը, իսկ թե ով է ընկերության ներկայիս տնօրենը կամ պատասխանատուն՝ հայտնի չէ և ոչ էլ հնարավոր է պարզել:

Վերջին օրերին տեղացած թեթև ձյունը, սակայն, լուրջ պրոբլեմներ է ստեղծել նշված ճանապարհահատվածում: Տարբեր տեղերում մեքենաների կուտակումներ են... Մերկասառույցը ռիսկային է դարձրել ճանապարհի նորմալ շահագործումը, թեև այդ մայրուղին Հայաստանն արտաքին աշխարհին կապող տրանսպորտային ամենակարևոր ուղիներից մեկն է, եթե ոչ ամենակարևորը:

Հարց «Ճանապարհային դեպարտամենտ» հիմնադրամի ղեկավարներին՝ ո՞ր կազմակերպությունն է պատասխանատու Շինուհայրի խաչմերուկ-Հալիձոր-Տաթև-Քաշունիի խաչմերուկ մայրուղու ձմեռային սպասարկման համար:

Ու մի խնդրանք էլ՝ ճշտեք (եթե կարող եք)՝ ո՞վ է այդ ընկերության տնօրենը ու հարցրեք՝ ի վիճակի՞ է կազմակերպել նշված ճանապարհի ձմեռային սպասարկումը:

Ի դեպ, վերջին օրերին սպասարկման նման խայտառակ վիճակի ականատես եղանք նաև Շինուհայրի խաչմերուկից մինչև Գորիս ու Արցախի միջանցքի սկզբնամաս հասնող ճանապարհահատվածում, ինչպես և Շինուհայրի խաչմերուկից դեպի Երևան ձգվող (Մ-2) մայրուղում (մինչև Սիսիանի տարածաշրջան հասնող հատվածում):

Հ.Գ.

Կից ներկայացվող լուսանկարները, որ արտացոլում են այսօր առավոտյան Հալիձոր-Սատանի կամուրջ ճանապարհին տիրող վիճակը, մեզ է տրամադրել Շինուհայր գյուղի բնակիչ Եգոր Փարսյանը, ով իր սեփական տեխնիկայով մեկ շաբաթ շարունակ օգնում է երթևեկության կանոնակարգմանը:

Մի հանգամանք ևս՝ վերոնշյալ ճանապարհների շահագործման վիճակն ուղղակի անտանելի կլիներ, եթե չլինեին ԱԻՆ-ի Սյունիքի մարզային ծառայության և ՃՈ 2-րդ գումարտակի 6-րդ վաշտի 2-րդ դասակի ողջամիտ գործողությունները (դասակի հրամանատար, ոստիկանության փոխգնդապետ Արմեն Սարգսյան):

Աղբյուր՝ «Սյունիք»