Մարին Լե Պեն. «Ցանկալի է այն լուծումը, որով Ղարաբաղը կվերամիավորվի Հայաստանի հետ»
Ֆրանսիայի «Ազգային ճակատ» ազգայնական կուսակցությունը ներկայացնող նախագահի թեկնածու Մարին Լը Պենը հայտարարել է,որ Լեռնային Ղարաբաղի հարցում ցանկալի է այն լուծումը, որը հնարավորություն կտա Ղարաբաղին վերամիավորվել Հայաստանի հետ:Հայտնում է «Nouvelles d’Armenie»-ին:
Լը Պենը նշել է, որ նախկին ԽՍՀՄ-ի վարչական սահմաններն, իհարկե, շատ արագ են ձևավորվել, և նա կարծում է, որ Հայաստանը և Ադրբեջանը կարող են գալ այնպիսի համաձայնության, որ Լեռնային Ղարաբաղը միանա Հայաստանին:
«Անկախության փոխարեն, ես կարծում եմ, ցանկալի կլիներ, որ Ադրբեջանը և Հայաստանը համաձայնության հասնեն, ինչը թույլ կտար, որ Լեռնային Ղարաբաղը կարողանար վերամիավորվել Հայաստանին»,- ասել է Լը Պենը:
Ֆրանսիայի նախագահ ընտրվելու դեպքում էլ Մարին Լե Պենը շարունակելու է հիշատակել 20-րդ դարի առաջին՝ Հայոց ցեղասպանության զոհերի հիշատակը:
«Ավելին, 1915թ. բազմաթիվ հայերի ժամանումը Ֆրանսիա կարևոր իրադարձություն էր մեր երկրի պատմության մեջ, քանի որ նրանք մեծ ներդրում ունեցան նաև Առաջին աշխարհամարտից հետո մեր երկրի վերակառուցման գործում և կատարյալ կերպով ասիմիլացվեցին»,-ընդգծել է նա՝ միաժամանակ, սակայն, հավելելով, որ Հայոց ցեղասպանության զոհերի հիշատակի օրը չպետք է ընդգրկվի Ֆրանսիայի Հանրապետության պաշտոնական օրացույցում, քանի որ նման օրերը պետք է առնչվեն միայն ֆրանսիացիների կոլեկտիվ հիշողությանը:
«Կարևոր է, որ 1915թ. ցեղասպանությունը լայնորեն ճանաչվի աշխարհի բոլոր երկրների կողմից, իսկ Թուրքիան ի վերջո պետք է սկսի լրջորեն վերանայել իր պատմության այդ ահավոր էջը: Ֆրանսիան պետք է անպայման աջակցություն ցուցաբերի ճանաչման այս պայքարում ինչպես մարդու իրավունքների հայրենիքի իր կարգավիճակի պատճառով, այնպես էլ հանուն այն մեծաթիվ հայերի, ովքեր ապաստան գտան այստեղ և հաջողությամբ ինտեգրվեցին»,-ավելացրել է Լե Պենը:
Zham.am