Սերժ Սարգսյանը մաքրում է ՀՀԿ-ն «հին գվարդիայից» և փոխարինում «դեղնակտուց» հանրապետականներով
Իշխանական թերթերից մեկը գրել է, որ մեր բարի մաէստրո Գալուստին թոշակի են ուղարկում։ Սա ինքնին ցավալի է, քանի որ իր ցնդաբանությունները մշտապես մեզ զվարճացնում էին ու մի տեսակ ցրում այն մռայլ գաղջությունը, որ տիրում է քաղաքական դաշտում։ Սակայն սա դեռ ամենը չէ, բարի Գալուստի փոխարեն Սերժ Սարգսյանը նշանակելու է չար Էդոին՝ Էդուարդ Շարմազանովին։ Ասեմ ավելին, Վահրամ Բաղդասարյանին էլ կփոխարինի Արմեն Աշոտյանը՝ դառնալով ՀՀԿ խմբակցության ղեկավար։
Այս ծաղրածուները, թեև խայտառակում են մեր պետությունը՝ զբաղեցնելով բարձրաստիճան պետական պաշտոններ, սակայն նրանք անփոխարինելի են Սերժ Սարգսյանի համար, քանզի իրենց դիրքով ու պաշտոնով պարտական են միմիայն իրենց կուսակցահայր Սերժ Սարգսյանին։ Իսկ այս փուլում ՀՀԿ ղեկավարին շատ են պետք հավատարիմ մարդիկ։ Եվ ո՞վ կարող է ավելի հավատարիմ լինել Սերժ Սարգսյանին, քան Շարմազանովն ու Աշոտյանը, որ եթե «պապան» հանկարծ ձեռքը գլխներից հանի, դրանց իրենց սեփական կուսակիցները կհոշոտեն։
Նրանք պարզապես փախչելու տեղ չունեն։ Եթե ուշադիր լինեք, այս նոր խորհրդարանը և կառավարությունը լի են այդպիսի մարդկանցով։ Ուշադիր տեսեք, թե Կարեն Կարապետյանի խարիզմատիկ կերպարի հետևում ում է թաքցրել Սերժ Սարգսյանը։ Վիգեն Սարգսյանը, որ Աշոտյանից ու Շարմազանովից մի փոքր քթածակով է տարբերվում ու հրապարակային ելույթներ աշխատում է չունենալ։ Տարոն Մարգարյանը, որ բացարձակ հեղինակություն չունի ոչ քաղաքում՝ որպես քաղաքապետ, ոչ էլ կուսակցությունում։ Միհրան Պողոսյանը, որ պարզապես միջին տրամաչափի աֆերիստ է, այն էլ ոչ այնքան խելացի՝ հաշվի առնելով, որ նրա օֆշորային հաշիվները բացահայտվեցին և միայն Սերժ Սարգսյանի շնորհիվ նա բանտում չհայտնվեց։
Այս ընտրությունների ընթացքում Սերժ Սարգսյանը հնարավորինս փորձեց ազատվել քիչ թե շատ կշիռ ունեցող և իրենցից ուժ ներկայացնող նախկին թիմակիցներից։ Եվ խնդալուն այն է, որ շատ մարդիկ դա ողջունեցին։ Ազատվելով «հին գվարդիայից» Սերժ Սարգսյանը պատրաստվում է 2018 թվականին, երբ այդ «դեղնակտուց» հանրապետականներն իրեն ընտրեն վարչապետ, քանզի ոչ այդ ջահելները կարան առանց Սերժ Սարգսյան գոյատևել, ոչ էլ վերջինս առանց այդ պաշտոնի կարող է ապահովել նույնիսկ իր ֆիզիկական գոյությունը։
Սամվել Ստեփանյանի ֆեյսբուքյան էջից