Կարող եմ հավակնել լուրջ պաշտոնների ողջ Հայաստանի տարածքում, ներառյալ Արցախն ու Արևմտյան Հայաստանը
ՀԱՅԱՍՏԱՆՅԱՆ «ԾԱՂԿԵՓՈՒՆՋ»
(օրվա «թեժ» թեմայով)
Ծնվել եմ Երևանում, թեպետ այդ ժամանակ մեր ընտանիքն ապրում էր Քյավառում (Կամո, Գավառ): Հայրս բնիկ տավուշեցի (Թովուզ գյուղից), մայրս՝ երևանցի: Ես Երևանում եմ ծնվել, քանի որ մայրս մտածել է, որ իրենք Քյավառում մի 3 տարի են մնալու (ըստ ուսուցիչ հորս նշանակման ժամկետի), էլ ինչո՞ւ որպես իր երեխաների ծննդավայր «օտար» մի քաղաք նշվի:
Մանկությունս անցել է Քյավառում (ամառները՝ հաճախ Տավուշում), դպրոցն այնտեղ եմ ավարտել:
Բարձրագույն կրթություն եմ ստացել Երևանում ու մնացել մայրաքաղաքում (արդեն 37 տարի):
Ես փաստորեն և՛ տավուշեցի եմ, և՛ քյավառցի, և՛ երևանցի:
Իսկ մի քիչ էլ որ փորփրում եմ, մայրական կողմով անցնում եմ Արևմտյան Հայաստան: Երբ ավելի եմ խորանում, հայրական կողմիս արմատները տանում են 18-րդ դարավերջի Արցախ (իսկ Աշխեն տատիս տոհմը Մուշից է. Տավուշ են եկել 16-րդ դարում):
Այս «խառը» պատմությունն ինչո՞ւ եմ անում:
Ըստ ծննդյան վկայականի և ծագումնաբանության՝ փաստորեն կարող եմ հավակնել լուրջ պաշտոնների ողջ Հայաստանի տարածքում, ներառյալ Արցախն ու Արևմտյան Հայաստանը:
Դավիթ Գյուրջինյանի ՖԲ էջից