Այս 25 տարիների ընթացքում մեզ դեռևս չի հաջողվել Հայաստանը դարձնել ողջ հայության համար ցանկալի հանգրվան. Վ. Օսկանյան
«Օհանյան-Րաֆֆի-Օսկանյան» դաշինքի առաջնորդները մասնակցում են «Հոգևոր Հայաստան» նախաձեռնության՝ «Ամեն մի գիշեր ունի լուսաբաց» խորագրով համաժողովին, որի նպատակն է դատապարտել իշխանությունների գործողություններն ընտրությունից առաջ։
Համաժողովին ելույթով է հանդես եկել նաև «Օհանյան-Րաֆֆի-Օսկանյան» դաշինքի անդամ, «Համախմբում» կուսակցության նախագահ Վարդան Օսկանյանը:
«Հիշում եմ անցյալ տարվա սեպտեմբերին էր, երբ նրանք սկսեցին այս առաքելությունը, իրենց հայտարարությունը շրջանառության մեջ դրեցին. ես և Րաֆֆի Հովհաննիսյանն առաջիններից էինք, ովքեր աջակցեցինք և միացանք այդ հայտարարությանը, որովհետև այն գաղափարական խոսքերը, որոնք դրվել էին դրա հիմքում շատ հոգեհարազատ էր այն մարդկանց համար, որոնք ծնվել են Սփյուռքում, ապրում են հայրենիքում, եղել են հայրենադարձությւոնից հետո առաջին ծիծեռնակները:
Հայրենիքն այլ կերպ չեմ պատկերացնում, քան ողջ հայության վերջնական հանգրվանը: Այս 25 տարիների ընթացքում մեզ դեռևս չի հաջողվել Հայաստանը դարձնել ողջ հայության համար ցանկալի հանգրվան: Ես կարծում եմ, որ մենք դա պետք է ուղղենք, այսօրվա հրամայականն ուղղակի դարձել է այժմեականություն: Մեզ համար բեկումնային քայլեր են պետք, որպեսզի կարողանանք մեր առաջ ծառացած այս մարտահրավերներին ոչ միայն դիմագրավել, հաղթահարել, այլև նաև կարողանալ առաջընթաց ապահովել», - ասաց իր ելույթում Վարդան Օսկանյանը:
ՀՀ նախկին արտգործնախարարն իր ելույթում մատնանշեց նաև պետության չորս հիմնասյուները՝ ղարաբաղյան հաղթանակը, Առաքելական եկեղեցին, պետականությունը և Հայքի գաղափարը, որը ներառում է համայն հայությունը:
zham.am