Սյունիքում վարչապետի կողմից իրականացված քարոզչությունն իրավաչափ է. ԿԸՀ
Վարչապետ Կարեն Կարապետյանի կողմից Սյունիքի մարզում իրականացված քարոզչությունն իրավաչափ է, եւ Ընտրական օրենսգրքի որեւէ իրավանորմի խախտում առկա չէ, քանի որ նախընտրական քարոզչություն իրականացնելու սահմանափում կիրառվում է՝ ոչ թե կապված աշխատաժամանակի հետ, այլ պաշտոնական լիազորությունների իրականացման: Նման հայտարարություն է տարածել ՀՀ Կենտրոնական ընտրական հաննաժողովը (ԿԸՀ):
ԿԸՀ-ն պարզաբանել է, որ Հայաստանի Ընտրական օրենսգրքի 19-րդ հոդվածի 5-րդ մասի 1-ին կետի համաձայն` «Արգելվում է նախընտրական քարոզչություն կատարել եւ ցանկացած բնույթի քարոզչական նյութ տարածել պետական եւ տեղական ինքնակառավարման մարմիններին, ինչպես նաև պետական եւ համայնքային ծառայողներին (բացառությամբ Ազգային ժողովի պատգամավորների), ուսումնական հաստատությունների մանկավարժական կազմի աշխատողներին` իրենց լիազորություններն իրականացնելիս»:
Սակայն օրենքով նախատեսված որոշակի եւ հստակ սահմանափակումների պահպանման պայմանով, նշված պաշտոնյաներին արգելված չէ նախընտրական քարոզչություն կատարել եւ ցանկացած բնույթի քարոզչական նյութ տարածել:
Համապատասխան սահմանափակումներ նախատեսող նորմերով արգելքներն ուղղակիորեն սահմանվում են միայն այն դեպքերի համար, երբ նախընտրական քարոզչությունն ու ցանկացած բնույթի քարոզչական նյութի տարածումն իրականացվում է տվյալ անձանց լիազորություններն իրականացնելիս։
Ընդ որում` օրենքը նշված գործունեությունը կամ գործողությունները տվյալ անձանց կողմից իրականացնելու սահմանափակում է նախատեսում հենց այդ իրավասություններն իրականացնելիս, այսինքն` օրենքն արգելում է պաշտոնատար անձին նախընտրական քարոզչության իրականացման եւ պաշտոնական լիազորությունների իրականացման մեկտեղումը, սակայն օրենքը չի արգելում անձանց իրականացնելու որեւէ կուսակցության օգտին նախընտրական քարոզչություն միայն այն պատճառով, որ տվյալ անձը միեւնույն ժամանակ հանդիսանում է պաշտոնատար անձ։