Ոչ ֆորմալ հանդիպման ժամանակ քննարկվել են բնապահպանության ոլորտի հիմնարար խնդիրներ

Բնապահպանական խնդիրները ոչ ֆորմալ մթնոլորտում քննարկելու գաղափարը կլոր սեղանի շուրջ էր հավաքել ՀՀ բնապահպանության նախարարության, գիտական ու հասարակական կազմակերպությունների ներկայացուցիչներին:

Նախարար Արծվիկ Մինասյանը հրավերին արձագանքած մասնագետների հետ քննարկել է բնապահպանության ռազմավարությունը, անելինքերը, ոլորտի գերակա ուղղությունները: Քննարկման ժամանակ անդրադարձ է կատարվել ոլորտում մեկնարկած բարեփոխումներին, մասնավորապես` տեսչական բարեփոխումներին, բնապահպանական թույլտվությունների միասնական համակարգի ներդրմանը,կադրային նոր քաղաքականությանը, էկոկրթության դերի բարձրացմանը:

Գերատեսչության ղեկավարի պաշտոնն ստանձնելուց անմիջապես հետո Արծվիկ Մինասյանը սկսել է հանդիպումները ոլորտում բազմամյա գործունեության փորձ ունեցող քաղաքացիական հասարակության ներկայացուցիչների, գիտնականների և մասնագետների հետ:

«Գալով նախարարություն չեմ դադարել տնտեսագետ լինել, բայց վերանայել եմ իմ մոտեցումները, և վստահաբար կարող եմ ասել, որ երկրի զարգացումը չեմ պատկերացնում առանց շրջակա միջավայրի բարելավման, պահպանման: Եվ հիմա հասկանում եմ այն հասարակական կազմակերպությունների ներկայացուցիչներին, որոնք մտահոգություն ունեն, որ տնտեսության զարգացումը երբեմն ընթանում է հաշվի չառնելով սոցիալական եւ էկոլոգիական կոմպոնենտները: Այո′, մենք էստեղ պետք է վերանայենք մոտեցումները և անկեղծանամ, որ կառավարության ներսում էլ է ընթանում այս թեմայի շուրջ բանավեճեր»,- ասել է Արծվիկ Մինասյանը:

Բնապահպանության նախարարը երկրի սոցիալ-տնտեսական զարգացման մոդելը տեխնածին է համարում և ներկայում աշխատում են նոր ռազմավարության վրա, ինչը ոլորտում հիմնարար փոփոխություններ է նախատեսում:

«Այս իրավիճակից դուրս գալու ելքը, իմ խորին համոզմամբ, նոր քաղաքականության իրականացումն է: Քաղաքականություն, որը տեխնածին տնտեսական աճից անցում կկատարի կայուն զարգացմանը: Շրջակա միջավայրի պահպանումը, բարելավումը պետք է իրականացվի կայուն զարգացման հիմքների վրա՝ հաշվի առնելով սերունդների նկատմամբ պատասախանատվությունը»,- նշել է բնապահպանության նախարարը:

Հասարակական կազմակերպությունների ներկայացուցիչները պայմանավորվեցին այս ձևաչափով կրկին հանդիպել: Որոշվեց մի շարք ծրագրերի հերթական քննարկումը կազմակերպել ՀՀ ԱԺ ընտրություններից հետո: