ՀՀ ԱԳ փոխնախարարը զավեշտ է որակում եվրախորհրդարանականների դեմ քրգործը Ադրբեջանում
«Վաղուց արդեն Ադրբեջանի իշխանություններն ամեն ինչ զավեշտի են վերածում՝ թե՛ միջազգային իրավունքը, թե՛ իրենց նույնիսկ ներքին կյանքը», - այսօր «Ազատության» հետ զրույցում հայտարարեց Հայաստանի արտգործնախարարի տեղակալ Շավարշ Քոչարյանը՝ պատասխանելով Ադրբեջանի գլխավոր դատախազության վերջին որոշումներին վերաբերող հարցին:
«Այսօր ես հրաժարվում եմ մեկնաբանել, դա ուղղակի զավեշտ է, և բնականաբար որևէ ձևով չի կարող ազդել դեպի Արցախ այցելությունների վրա», - շեշտեց Հայաստանի ԱԳ փոխնախարարը։
Ադրբեջանի գլխավոր դատախազությունը, տեղական լրատվամիջոցների փոխանցմամբ, Ինտերպոլով միջազգային հետախուզում է հայտարարել Եվրախորհրդարանի պատգամավորներ Ֆրանկ Էնգելի (Լյուքսեմբուրգ), Էլենի Թեոխարուսի (Կիպրոս) և Յարոմիր Շտետինայի (Չեխիա) նկատմամբ՝ Լեռնային Ղարաբաղում սահմանադրական բարեփոխումների հանրաքվեն դիտարկելու համար: Նրանց դեմ Ադրբեջանում քրեական գործ է հարուցվել Լեռնային Ղարաբաղ բազմիցս «ապօրինի այցելելու» համար, և ադրբեջանական դատարանը երեք եվրախորհրդարանականներին կալանավորելու որոշում է ընդունել, հաղորդում է APA լրատվական գործակալությունը:
Մանրամասները՝ «Ազատություն»-ում: