Արդյոք բանակի ծխախոտը չի՞ կրկնի 4000 դրամների պատմությունը
Պաշտպանության նախարարի նախաձեռնությունը՝ հրաժարվել զինծառայողներին ծխախոտ տալու սովորույթից և դրա փոխարեն որոշ չափի գումար փոխանցել, իհարկե, դրական է նախևառաջ առողջ ապրելակերպի տեսանկյունից: Բայց մեր ռազմական գերատեսչության ղեկավարներն արդյոք վստա՞հ են, որ զինվորի համար պետբյուջեից դուրս գրվող փողը կհասնի հասցեատիրոջը:
Մենք լավ գիտենք, թե ինչպես է զորամասերում ժամկետային զինծառայողների ձեռքից վերցվում (կամ ընդհանրապես զինվորին չի հասնում) հասանելիք 4000 դրամը տարբեր պատճառաբանություններով՝ ֆոնդի փող, պակաս ինչ-որ բաներ գնելու փող և այլն: Բոլորս, իհարկե, լավ ենք հասկանում, որ բանակի հիմնական վնասատուները միջին օղակի չինովնիկներն են, որոնք հնարավոր ամեն կերպ գողանում են պետության փողը, զինվորի համար նախատեսված փողը:
Ուզում եմ հարց տալ մեր ռազմական գերատեսչության ղեկավարությանը՝ մարդասիրական, իրոք լավ, առողջ նպատակի համար կյանքի կոչվող այս քայլը արդյո՞ք հերթական առիթ չի տա մանր չինովնիկներին՝ զինվորներից գողանալու հերթական 3000 կամ 4000 դրամը:
Ամենահասարակ հաշվարկով՝ 500 ժամկետային զինծառայող ունեցող զորամասում հասանելիք 4000 դրամները յուրացնելով, այդպիսի անբարոյական չինովնիկը ամսական պետությունից գողանում է մինչև 2 մլն դրամ, տարեկան՝ 24 մլն դրամ (մոտ 50.000$): Սա գործող վճարների դեպքում: Իսկ ի՞նչ երաշխիք կա, որ ծխախոտի դիմաց փոխանցվող նույն չափի գումարը ևս չի դառնա նույն չինովնիկների գրպանի, այլ կերպ ասած՝ ատկատի փող:
Նաիրի Հոխիկյանի ֆեյսբուքյան էջից