17 նախարարությունից կմնա 12-ը․ քննարկվում է կառավարության ապագա կառուցվածքը

ՍիվիլՆեթ-ին մանրամասներ են հայտնի դարձել առաջիկայում կառավարության կառուցվածքային փոփոխությունների մասին։ Ընդհանուր առմամբ՝ նախատեսվում է 17 նախարարություններից թողնել 12-ը։

Առաջիկա օրերին կառավարության կառուցվածքի և գործունեության մասին օրենքում փոփոխություններ ու լրացումներ կատարելու մասին օրենքի նախագիծը կմտնի շրջանառության մեջ։ Նոր փոփոխություններով նախատեսվում է առաջին փոխվարչապետի հաստիքի կրճատում։ Մամուլի հրապարակումների համաձայն՝ այս պաշտոնը հատուկ ստեղծվել էր Սերժ Սարգսյանի վարչապետությունից հետո նախկին վարչապետ Կարեն Կարապետյանի համար։ Քննարկվում է փոխվարչապետերի թիվը երեքից մեկի հասցնելու հարցը։

Ըստ փոփոխությունների՝ սփյուռքի նախարարությունը լուծարվում է։ Քննարկվում է տարբերակ, ըստ որի, սփյուռքի հետ կապերը համակարգվելու են փոխվարչապետի գրասենյակի կողմից։ Ստեղծվելու է ենթակառուցվածքների և պետգույքի նախարարություն։ Այս նախարարությունն իր մեջ ներառելու է տրանսպորտի, էներգետիկայի և պետգույքի ոլորտները։ Սա դառնալու է ամենախոշոր նախարարություններից մեկը։ Տրանսպորտի, կապի և տեղեկատվական տեխնոլոգիաների նախարարությունը դառնալու է կապի և բարձր տեխնոլոգիաների նախարարություն։ Նախատեսվում է, որ կմիավորվեն տնտեսական զարգացման և գյուղատնտեսության նախարարությունները։

Աշխատանքի և սոցիալական հարցերի նախարարությունը կմիավորվի տարածքային կառավարման և զարգացման նախարարության հետ։

Մշակույթի, սպորտի և երիտասարդության նախարարությունները միավորվելու են կրթության և գիտության նախարարության հետ։

Որպես առանձին նախարարություններ կշարունակեն գործել ֆինանսների, արդադարադատության, առողջապահության և բնապահպանության նախարարությունները։

Կառավարության կառուցվածքում փոփոխություններ իրականացնելու հարցը կարող է քննարկվել նոր ձևավորված ԱԺ առաջին նիստում, որը տեղի կունենա հունվարի առաջին աշխատանքային օրը։

ՍիվիլՆեթ