Քաղաքական հետագիծ. ով, որտեղից է եկել
Արտահերթ խորհրդարանական ընտրություններին ընդառաջ՝ Zham.am-ն ուսումնասիրել է ընտրություններին մասնակցող «Իմ քայլը» դաշինքի, ՀՀԿ-ի և ԲՀԿ-ի նախընտրական ցուցակները գլխավորող թեկնածուներին քաղաքական ճանապարհը…
«Իմ քայլը» դաշինքը գլխավորող Նիկոլ Փաշինյանի քաղաքական գործունեությունը սկսվել է 1998 թ-ից, երբ նա նախագահի թեկնածու Աշոտ Բլեյանի նախընտրական շտաբի անդամ էր:
2006 թ-ին Նիկոլ Փաշինյանը մասնակցում է «Այլընտրանք» նախաձեռնության հիմնադրմանը, 2007 թ-ին գլխավորում է «Իմպիչմենթ» նախընտրական դաշինքը:
Նշենք նաև, որ 1992 թվականից, երբ Փաշինյանը զբաղվել է լրագրությամբ, ունեցել է ընդգծված քաղաքական ընդդիմադիր կեցվածք և հաճախ է հետապնդվել քաղաքական հակասությունների պատճառով:
Պայթեցված Նիվայի կողքին կանգնած Նիկոլ Փաշինյանի նկարը բոլորս ենք հիշում:
Դեպքը տեղի էր ունեցել 2004 թվականի նոյեմբերի 22-ին: Դեպքից հետո Փաշինյանն իրավապահներին առաջարկել էր քննել այն վարկածը, ըստ որի՝ ավտոմեքենայի պայթեցման ետևում կանգնած է ԲՀԿ ղեկավար Գագիկ Ծառուկյանը:
Չենք սխալվի, եթե ասենք, որ Փաշինյանի քաղաքական կարիերայի կայացման առումով ամենակարևորն ու հիմնայինը եղել են ՀՀ առաջին նախագահ Լևոն Տեր-Պետրոսյանի թիմում աշխատելու տարիները: 2008 թվականին Փաշինյանը եղել է ՀՀ նախագահի թեկնածու Լևոն Տեր-Պետրոսյանի նախընտրական շտաբի անդամ: ՀԱԿ–ի հանրահավաքների ժամանակ Փաշինյանն աչքի էր ընկնում բոցաշունչ ելույթներով և լսարանի հետ կոնտակտի մեջ մտնելու կարողությամբ:
2008 թ-ի մարտի 1-ի հայտնի դեպքերից հետո Փաշինյանն անցնում է ընդհատակ, որտեղից վերադառնում է շուրջ մեկուկես տարի անց:
Նիկոլ Փաշինյանի օրենսդիր գործունեությունը սկսվել է 2012 թ-ից, երբ նա ՀԱԿ ցուցակով ստացավ պատգամավորական մանդատ: 2013 թ-ին Փաշինյանը հիմնադրել է «Քաղաքացիական պայմանագիր» հ/ք միավորումը, որը երկու տարի անց գրանցվեց որպես կուսակցություն:
2017 թ-ին Փաշինյանը կրկին ընտրվում է ԱԺ պատգամավոր ներկայացնելով «Ելք» դաշինքը:
Ս/թ մարտի 31-ին Փաշինյանը Գյումրիից սկսում է Իմ քայլը արշավը, որի հանգուցալուծումը դառնում է թավշյա հեղափոխությունը: Ապրիլի 23-ին վարչապետ Սերժ Սարգսյանը հրաժարական է տալիս, որից հետո՝ մայիսի 8-ին Նիկոլ Փաշինյանն ընտրվում է ՀՀ վարչապետ:
ԲՀԿ նախընտրական ցուցակը ղեկավարող Գագիկ Ծառուկյանի քաղաքական կարիերան սկսվել է 2003 թվականից, երբ նա ընտրվել է ԱԺ պատգամավոր: 2004 թվականին հիմնադրել է «Բարգավաճ Հայաստան» կուսակցությունը, որը ղեկավարում է մինչև օրս:
2007 թվականի մայիսի 12-ին ԲՀԿ-ն առաջին անգամ մասնակցում է խորհրդարանական ընտրություններին՝ ԱԺ-ում ձեռք բերելով 25 մանդատ:
2008-ի փետրվարի նախագահական ընտրությունների ժամանակ Գագիկ Ծառուկյանը պաշտպանում է ՀՀԿ թեկնածու Սերժ Սարգսյանի թեկնածությունը:
Մարտի 21-ին Գագիկ Ծառուկյանը Սերժ Սարգսյանի, Արթուր Բաղդասարյանի և Արմեն Ռուստամյանի հետ կնքում է քաղաքական կոալիցիայի համաձայնագիր:
2012 թ-ն Ծառուկյանը կրկին ընտրվում է ԱԺ պատգամավոր, խորհրդարանական ընտրություններից հետո ԲՀԿ-ն հայտարարում է կոալիցայից դուրս գալու մասին:
2013 թ-ին, երկար քննարկումներից հետո Ծառուկյանը, այնուամենայնիվ որոշում է չմասնակցել նախագահական ընտրություններին:
2014 թվականին քաղաքական դաշտում կրկին թեժանում է, ստեղծվում է Քառյակը, որի անդամներին էին ԲՀԿ-ն, ՀԱԿ-ը, Ժառանգությունը և ՀՅԴ-ն: Տեղի են ունենում հանրահավաքներ, ֆորումներ, տարբեր համաժողովներ: Թվում էր ամեն ինչ գնում է դեպի իշխանափոխություն:
Սակայն 2015 թվականի փետրվարի 12-ի նախագահ Սերժ Սարգսյանի հայտնի ելույթը սառը ջուր լցրեց հույսերի վրա:
Գագիկ Ծառուկյան քաղաքական դերակատարը մեր երկրի համար դարձել է չարիք, հայտարարեց Սերժ Սարգսյանը և հավելեց, որ «Այո, ողբերգություն է, ինչ-որ տեղ նաև զավեշտ է, որ Գագիկ Ծառուկյանը քաղաքական մեծ հավակնություններ ունի:
Փետրվարի 13-ին Գագիկ Ծառուկյանը հայտարարեց՝ ընդունել եմ մարտահրավերն ու գնալու եմ մինչև հաղթանակ, հավելելով, որ Հայաստանը պետք է մաքրել գաղջ մթնոլորտից:
Ինչևէ, մարտի 5-ին Ծառուկյանը հայտարարեց, որ հեռանում է քաղաքականությունից և այդ փակում է այդ էջը:
Էջը փակ մնաց 2 տարի՝ 2017 թ-ի հունվարի 17-ին Ծառուկյանը հայտարարեց, որ բացում է փակած էջը և վերադառնում քաղաքականություն:
2017 թ-ի ապրիլի 2-ի ընտրությունների արդյունքներով Գագիկ Ծառուկյանը կրկին ընտրվեց պատգամավոր:
ՀՀԿ ցուցակը գլխավորող Վիգեն Սարգսյանի ակտիվ և հրապարակային քաղաքական գործունեությունը երկար տարիների կյանք չունի:
Սարգսյանը պետական համակարգում սկսել է աշխատել դեռ 2003 թ-ից՝ սկսելով նախագահի օգնականից, 2011 թ-ի հոկտեմբերի 17-ից ստանձնել է ՀՀ Նախագահի աշխատակազմի ղեկավարի պաշտոնը:
2016 թվականի հոկտեմբերի 3-ին Վիգեն Սարգսյանը ստացել է նախարարական պորտֆել՝ մինչև ս/թ մայիսը զբաղեցնելով պաշտպանության նախարարի պաշտոնը:
2017 թվականի ապրիլի 2-ի խորհրդարանական ընտրություններում ևս Վիգեն Սարգսյանը գլխավորում էր ՀՀԿ ցուցակը, չնայած որ հրապարակային քարոզարշավին նա գրեթե չէր մասնակցում:
Պատրաստեց՝ Ակաթի Վահանյանը